Tom Dixon

Ég hef lengi látið mig dreyma um þessa fallegu kertastjaka frá Tom Dixon. Ég er voðalega skotin í þeim. Ég hef þó ekki enn fundið þá hér á landi...en reyndar hef ég ekki farið mikið í búðir uppá síðkastið. En ef þið vitið hvar þeir fást þá vil ég glöð vita það :) 

Finnst ykkur þeir ekki fallegir?

Bourgie

Þótt ótrúlegt megi virðast þá eru komin 10 ár síðan Bourgie lampinn frá Kartell kom fyrst á markað. Lampinn er hannaður af ítalanum Ferruccio Laviani. 

Í tilefni af 10 ára afmæli lampanns fagra þá bauð Kartell 14 flottum hönnuðum og hönnunarteymum að vinna með lampann á þeirra eigin hátt. Útkoma hönnuðanna var hreint út sagt frábær og margar fallegar útgáfur af lampanum litu dagsins ljós... en líka margar steiktar :) 

Lamparnir sem hönnuðirnir gerðu verða svo sýndir  í Maison&Objet í París og síðar mun sýningin ferðast um. 

Uppáhalds lampinn minn er hér að ofan og er eftir sænksa hönnunarteymið Front Design. Þær stöllur í Front hituðu lampann upp og mótuðu hann aftur þannig að það kom einhver ótrúlegur karakter í lampann. 

Hér fáið þið að sjá mínar uppáhalds útkomur :) 

Fyrir ofan: Christophe Pillet

Fyrir neðan: Patrick Jouin

 - á lampanum stendur: 

"The Future is a Present From The Past!"

Fyrir ofan: Ludovica + Roberto Palomba

Restina af lömpunum má skoða HÉR.

Dagatalið 2014

Ég er búin að hugsa síðan á áramótum að nú sé árið komið sem ég bý til mitt eigið dagatal. Ég hef verið að leita mér að innblæstri hér og þar og svo loks ákvað ég að mitt dagatal yrði að vera svolítið ekta ég. Þar sem Múlalundur hefur "óvart" verið viðriðinn mörg af mínum verkefnum í gegnum tíðina þá fannst mér nú bara alveg sjálfsagt að nota möppuspjald undir dagatalið mitt. 

Og hvenær er besti tíminn til að dunda í dagatali í illustrator ef ekki þegar maður á að vera að læra? Maður spyr sig... ?  

....þannig að, á meðan ég setti saman þetta "ekta ég" dagatal, 

þá beið bara mastersritgerðin mín róleg. 

Þekkir þetta einhver annar en ég?

Marmara ást

Ég er eitthvað svo yfir mig spennt fyrir marmara þessa dagana. Ég bara nánast ræð ekki við mig þegar ég skoða myndir og læt mig dreyma um þessa rándýru steintegund. 

Þess vegna voðalega heppin þegar ég kíkti í Búkollu - nytjamarkað í síðustu viku. Ég rakst á þessa agnarsmáu og ótrúlega fallegu marmarakrukku sem má sjá hér á myndinni fyrir ofan. Hjartað á mér tók smá auka kipp þegar ég tók krukkuna sem kostaði aðeins 250kr. Kostakaup á fallegri vöru. Krukkan fékk það hlutverk að geyma saltflögur við hliðiná piparkvörninni við eldamaskínuna mína og hefur mikið verið notuð á þessum stutta tíma sem ég hef átt hana. Fyrir ykkur hin þá var til önnur svona sem ég tók ekki vegna þess að það var örlítið búið að kvarnast uppúr henni. Sumir setja það svosem ekki fyrir sig... það var ekki mikið kvarn. 

En afþví ég er með marmara ást þá læt ég fylgja nokkrar fallegar myndir af marmara á heimilum. 

Ég er sjúk í flísarnar hér á myndinni fyrir neðan!

Royal Copenhagen / Blue Denmark.

Ég safna þessu stelli sem sést hér á myndunum fyrir ofan og neðan. Ég á/safna matarstellið sem hefur verið keypt alltaf jafn óðum í Búsáhöldum í Kringlunni. En svo hef ég líka komist yfir nokkra gamla muni úr þessu fallega stelli og í lok síðasta árs komst ég yfir einn fallegann bolla og stórt fat undir kjöt. Þessa muni komst ég yfir í bílskúrs/antik sölunni sem ég hef svo oft nefnt hér áður. Konan sagði við mig þegar ég keypti plattann að þetta væri með original stimplinum. En þá fór ég að hugsa og hef hugsað svolítið síðan. Hvað er orginal stimpillinn og er verið að selja eitthvað fake?

Matarstellið mitt sem ég hef keypt reglulega í Búsáhöldum hefur stimpilinn Johnson Bro's, England 1883 - Blue Denmark. En Antik keramikið sem ég á og sést hér á næstu mynd fyrir neðan hefur aðra sögu að segja. Fatið mitt hefur Furnivals víkingaskips stimpilinn sem eftir minni grennslan er framleitt af Furnivals í Englandi frá árinu 1880 - 1963 en þá fór Furnivals á hausinn. Furnivals framleiddi Blue Danmark eða Danmark línuna sem er þetta munstur sem er byggt á munstri sem dönsk postulínsframleiðsla framleiddi á 18. öld. En munstrið á sér miklu lengri sögu. 

Það var maður að nafni Frantz Heinrich Muller sem hóf framleiðslu á þessu munstri í postulín einhverntímann á árunum 1776 - 1779 í Kaupmannahöfn en munstrið kom hann með heim frá Þýskalandi eftir að hafa farið þar um og heimsótt postulínsverksmiðjur. Munstrið varð þá þekkt sem Danska munstrið. Muller þróaði bláa litinn sem þótti fallegur og varan hans varð strax vinsæl. Fyrirtækið fór hinsvega á hliðina en var bjargað fjárhagslega af Christian VII konungi danaveldis og fékk þá fyrirtækið nafnið Royal Copenhagen. 

En í Þýskalandi hefur munstrið líka verið framleitt. Örlítið öðruvísi munstur en samt það lítið öðruvísi að það sést varla. Blöð blómanna eru ekki lituð og munsturs dúllan efst er ekki. Þessi framleiðsla kallast Jager Eiseinberg Original Blau Saks. Kannski er það þetta sem er upprunalega munstrið sem að Muller kom með heim frá Þýskalandi og betrumbætti í Danmörku? 

Bollinn hægrameginn á myndindinni hér fyrir neðan er einmitt merktur Jager Eisenberg og kemur frá Þýskalandi. En framleiðsla á þessu stelli eins og það lítur út þarna var frá árinu 1869 - 1973 undir merkinu Jager Eisenberg. Áður var munstrið í framleiðslu óþekkts merkis þar í landi. 

Eftir minni eftirgrennslan þá virðist sem að Furnivals og Royal Copenhagen hafi verið í einhversskonar samstarfi. Eftir að Furnivals fór á hausinn tel ég líklegt að Johnson Bro's hafi tekið við framleiðslunni (eða eitthvað annað fyrirtæki komið þarna inn á milli...veit ekki alveg).

Sagan segir samt að uppruni munstursins komi upphafleg frá Kína löngu fyrr. Hver veit? 

Fyrir ofan: Furnivals

Fyrir neðan: Jager Eisenberg.

Ýmislegt hér fyrir neðan læt ég mig dreyma um ;) 

Húsafellið fagra.

Við fjölskyldan kíktum í eina nótt í bústað til vinafólks okkar í Húsafell nú um nýliðna helgi. Það hafði snjóað rosalega nóttina áður en við mættum og veðrið var eins og best verður á kosið. Þvílíka náttúruperlan sem Húsafell er í svona fallegu veðri! Ég bara hreinlega gapti í allar áttir og tók endalaust af myndum. 

Við skelltum okkur að sjálfsögðu í göngutúr í þessari náttúrufegurð með börnin á þotum og sleðum í eftirdragi og skelltum okkur nokkrar ferðir niður brekkuna við sundlaugina. Ekki leiðinlegt skal ég segja ykkur og einhvernveginn bara miklu skemmtilegra þegar maður hefur svona fallegt landslag fyrir augunum á meðan börnin eyða orkunni í brekkunni. 

Árið 2013

Gleðilegt nýtt ár elsku þið!

Það er kominn tími á blogg á þessu nýja ári. Árið 2014 lofar góðu og ég horfi björtum augum á komandi tíma. En það er alltaf voða gaman að byrja árið á að líta yfir farinn veg í myndum. Það hefur verið venjan hjá mér að gera þetta, nema á síðasta ári, þá sleppti ég því sökum tímaleysis. Þetta tekur langann tíma, en er ótrúlega skemmtilegt.

Skoðum...

Í janúar fór ég á ótrúlega skemmtilega handverkssýningu þar sem litið er yfir farinn veg Sigrúnar Níelsdóttur. Við mæðgur bjuggum til snjólistaverk á einn vegg á húsinu okkar. Ég kynnti ykkur fyrir fallegu fötunum sem hægt er (var?) að kaupa í búðinni Beroma. Og svo auðvitað létum við okkur dreyma um sumarið í fallegum sumarhúsum. 

Í Febrúar var hinn skemmtilegi öskudagur þar sem börn landsins eru uppá sitt besta. Lítill frændi minn föndraði Lego kalla búning með pabba sínum og dætur mínar voru Lísa í Undralandi og Mína mús. Við elskum þennan dag og krúttlegheitin sem fylgja honum. Við skoðuðum nokkur falleg barnaherbergi ásamt því að skoða nýja skenkinn sem ég keypti í stofuna mína. 

Í Mars var HönnunarMarsinn haldinn og bar því til mikilla tíðinda í íslenskri hönnun. Ég lét mig auðvitað ekki vanta á sýningar borgarinnar. Ég eignaðist Eames ruggustól. Við fermdum Kristófer fósturson minn og skoðuðum mikið af fallegu páskaskrauti sem hægt er að gera heima. 

Í Apríl tók ég ljósmyndakúrs í skólanum, lærði að kenna eitthvað með því að sýna eingöngu myndir. Ákvað að kenna kökupinnagerð. Ég fjallaði um eina af uppáhalds listakonum mínum hana Aðalheiði Eysteinsdóttir. Mig dreymir um verk eftir hana. Ég lét mig líka dreyma um Moth ljós og púðana frá Markrún. Bloggið fékk líka umfjöllun í S&H undir fyrirsögninni "Áhugaverð íslensk blogg". 

Það gerðist ekki mikið í Maí. Ég fór jú á útskriftasýningu LHÍ í Listasafni Reykjavíkur þar sem mikið var um dýrðir. Órórar voru skoðaðir og einhver DIY verkefni. 

Júní var auðvitað bara allur um sumar, sól og LITI. Veggfóðrin frá Mr. Perswall voru skoðuð. Mjög falleg veggfóður framleidd hjá þeim. Náttuglur heilluðu okkur mjög, enda fallegar vörur sem framleiddar eru undir merkinu...og við elskum jú óróa. Postulín eftir Camila Prada. Skemmtilegar vörur með húmor og svo var farin skemmtileg mæðgnaferð í höfuðborgina þar sem endurnar voru heimsóttar niður á tjörn. 

Júlí var tími ferðalaga, brúðkaups og námskeiðs í Salt Eldhús. Makkarónunámskeiðið er eitt af nokkrum hlutum sem gerðust á árinu sem stendur uppúr. Frábær námskeið haldin hjá Salt og stefnan er tekin á eitt gott námskeið þetta árið líka. Ferðast var í Hrútafjörðin og gömul kjörbúð skoðuð með fullt af eldgömlu dóti, þ.a.m. litlar gúmmí dúkkur í körfu. Ég hálpaði vinkonu að undirbúa ljósmyndavegg fyrir brúðkaupið hennar. Beta keypti sér þennan fallega Songbird eftir Kay Bojersen ásamt því að kynna fyrir okkur sniðug viskastykki sem hægt er að sauma fígúrur úr þegar hætt er að nota þau. 

Ágúst var heldur leiðinlegur mánuður...veturinn skall of fljótt á og mánuðurinn var frekar kaldur. En þá ákvað Beta að stofna business, sauma taubleyjur fyrir litla bossa. Regnbogarassar fæddust. Ég þvældist bara um á flóamarkaði og lét mig dreyma um fallega hluti úr búðum. 

September var skemmtilegur mánuður því þá skrapp ég til París. En á blogginu skoðaði ég fallegt barnaherbergi, skoðaði hvað hægt er að gera úr vörubrettum og kynnti til leiks hana Unni Jónsdóttir og fallegu myndirnar sem hún er að gera undir merkinu UJónsdóttir. 

Október var bleikur út í gegn... Bleika slaufan og Brjóstapúðinn sem leit dagsins ljós við góðar undirtektir. Falleg vara sem ég hef því miður ekki enn náð að eignast. Besla kynnti fallega jólakjóla fyrir litlar skvísur. Ég eignaðist mynd eftir UJónsdóttir og svo bloggaði ég um skemmtilega veitingastaðinn MissKo sem er staðsettur í París. 

Nóvember var svolítið jólalegur. Ég skoðaði fullt af möguleikum hvað varðar pakkadagatöl. Eva Laufey gaf út uppskriftabókina sína sem ég auðvitað keypti mér. Eldskúlptúr, gjörningur á Ægissíðu var framin eftir mikla undirbúningsvinnu. Eldurinn breyttist í fallegt listaverk og ég fann minn innri brennuvarg þarna í nokkrar mínútur. Aðventukransar voru skoðaðir og ég gerði einn sem var mjög svipaður þeim sem ég gerði í fyrra. Og svo gerði ég þessi skemmtilegu jólatré og var með DIY færslu um þau. 

Desember var rosalega skemmtilegur eins og alltaf. Ég átti afmæli. Datt svo í lukkupottinn í Góða Hirðinum og fann Sóley, stóll sem er íslensk hönnun og nokkuð eftirsóknaverður í dag. Ég gerði pakkadagatal fyrir dætur mínar (ekki svo viss um að ég geri slíkt aftur...) Það kom umfjöllun um bloggið í Lífinu, fylgiriti fréttablaðsins og svo var dundað við að pakka inn jólagjöfunum. Engin saumavél dregin fram í þetta sinn þó. 

Dásamlegt ár að baki og ég vil bara þakka ykkur elskurnar mínar fyrir að lesa. Ég ætla að reyna að vera ennþá duglegri á nýju ári. Það eru einhverjar breytingar á bloggi í kortunum fyrir nýja árið, hvenær sem það gerist. En það verður bara breyting til betra :) 

Megi árið verða ykkur heillaríkt og færa ykkur endalausa hamingju.