DIY: Heimagerðir kertakrukkustjakar

Í síðustu viku fór ég að dunda mér með póstulínspenna á meðan ég beið eftir að kvöldmaturinn eldaðist. Ég ákvað að prufa að teikna á eina af þessum fjölmörgu krukkum sem hafa safnast saman heima hjá mér og gerði lítið þorp með jólastjörnu og snjókomu. Stelpurnar mínar fengu að sjálfsögðu líka að teikna sín listaverk en þær eru 9 og 4 ára. Við mæðgur sátum því saman í kósý stemmningu og gerðum jóla-kertastjaka. Listaverkin sem dætur mínar gerður voru að sjálfsögðu æðisleg og útkoman var þessir líka afskaplega fallegu og jólalegu kertastjakar. 

Eldri stelpan mín fór að sjálfsögðu að framleiða kertastjakana í nokkru mæli og ákvað að þetta yrði jólagjöfin frá henni í ár handa öllum sem hana langaði að gefa jólagjafir. 

Það sem þarf í þetta er ekki kostnaðarsamt en póstulínspennin fæst í föndru og kostar 995 krónur og svo eru það bara fallegu krukkurnar. Ég sýni ykkur þetta svona hrátt og eins og það lítur út eftir að teikningin hefur verið gerð, en auðvitað má setja á krukkuna borða eða falleg bönd, jólagrein eða köngul og gera þannig krukkurnar hátíðlegri (sem verður næst á dagskrá hjá okkur).

Hér fyrir neðan má sjá krukkurnar komnar á sína staði á heimilinu með kertaljósi og kósýheitum. 

Áramótagleði

Á áramótunum er alltaf gleði og glens hjá minni fjölskyldu. Allir hittast. Allir fá skemmtilega hatta og allir eru glaðir. Ég bjó til yfirvaraskegg fyrir alla í fjölskylduboðinu til þess að hafa í hverju glasi um síðustu áramót. Skeggin komu skemmtilegri stemmningu á yfir matnum og ungir sem aldnir höfðu gaman að. 

Það er lítið mál að búa til skegg til þess að festa á rör, en ég komst þó að því að skeggin eru ekki rétt staðsett ef það gatað með gatara á mitt skeggið og smellt uppá rörin. Best er að byrja á að búa til skapalón. Ég braut hvítt blað saman og klippti út helminginn af skegginu útfrá brotinu. Þá verður skeggið heilt þegar það er tekið í sundur og eins báðu megin. Því næst teikna ég á karton og klippi út. Svo er það að búa til lítinn renning með litlum flipa upp og niður. Renningurinn er límdur í hring utan um rörið og skeggi er límt á flipana útfrá renningunum, þannig helst skeggið ofaná rörinu og á sínum stað á efrivör þegar drukkið er úr glasinu :) - þetta tekur smá tíma í dúlleríi... en ekki svo langann að þetta sé ógerlegt :)

Gangi ykkur vel... 

og 

Njótið gamlársdags og nýja ársins. 

Jóla-nostalgía og föndur.

Svona afþví að loksins get ég almennilega einbeitt mér að jólunum... og blogginu, þá er um að gera að koma með einn jólapóst. 

Mig dreymir alltaf um að gera fallegan og ævintýralegan jólabæ fyrir litlu stelpurnar mínar. Það er pínu nostalgía í þessum draumi mínum þar sem að mamma setti alltaf upp fallegan burstabæ og kirkju ásamt trjám, snjó, dýrum og jólasveinum, þegar ég var lítil stelpa. Og það sem ég gat setið og horft á þetta. 

Hér má sjá nokkrar ódýrar aðferðir til að útbúa lítið jólaþorp. Allt er þetta gert úr ódýrum efnum eða afgangs efnum sem hægt er að nálgast ókeypis...eins og t.d. mjólkurfernuhúsin.
Þetta gæti verið skemmtileg föndurstund með börnunum og skapar örugglega fallegar minningar.

Kæri Jóli...

Eins og flestar konur þá er alltaf eitthvað sem mig langar í um jólin...annað en auðvitað frið á jörð og mat og öryggi fyrir börn heimsins. 

Ég setti saman smá óskalista fyrir jólasveininn ef hann skildi setja eins og einn pakka undir tréð handa mér þessi jólin. 

1. String kertastjaki frá Ferm Living sem til er í Hrím.  2. Katanes Ponsjó frá Farmers Market 3. Vasi frá Finnsdottir sem fæst í Mýrinni í Kringlunni. 4. Skútustaðir Vaxjakki frá Farmers Market 5. Verndarhendur - trefill frá Vík Prjónsdóttir sem til er í Aurum. 6. Brjóstapúðinn til styrktar Krabbameinsfélagi Íslands. 7. Fiducia vasinn eftir Louise Campbell og fæst í Hrím.

Hvað langar ykkur í?

Hugmyndasvampurinn í Fréttablaðinu.

Blaðamaður Fréttablaðsins hafði samband við mig í síðustu viku til þess að fá að skrifa grein um jólatrén sem ég póstaði hér á blogginu í síðustu viku. Það var bara gaman að einhver vildi fjalla um það sem ég er að gera. Í dag kom svo grein um bloggið og tréð í Lífinu, fylgiriti Fréttablaðsins. Greinin var bara ágæt, nema hvað að þarna var smávegis staðreyndarvilla. Í greininni segir að ég hafi útskrifast sem vöruhönnuður árið 2006 en það herrans ár byrjaði ég einmitt að læra vöruhönnun og ég útskrifaðist árið 2009. En slíkar villur eru víst nokkuð algengar í blöðunum svo þetta er bara allt í lagi. 

Eitt að allavega víst. Og það er að Hugmyndasvampurinn er í jólaskapi :) 

DIY: Jólatré

Ég föndraði þessi skemmtilegu jólatré um síðustu helgi og mér fannst útkoman bara nokkuð góð þó ég segi sjálf frá. Ég var enga stund að skera tréin út en það tók þónokkuð langann tíma að mála þau.

En fyrir ykkur elsku blogglesendur hef ég ákveðið að henda inn smá leiðbeiningum að svona tré. Læk á það er það ekki?  :) 

Til að byrja með þurfið þið kæru föndrarar að gera ykkur ferð í Handverkshúsið. Kaupa þar 2-3mm þykkan balsavið. Viðurinn kemur í 1m lengjum og 1m dugði mér í 3 tré... bara lítil tré. En viðurinn býður ekki uppá að gera stór tré þar sem viðarplöturnar eru alls ekki breiðar. 

Það sem þarf: 

Balsaviður

góð reglustika eða T-stika

dúkahnífur

blýantur

svartur línutúss (fyrir þá sem ætla að gera svart munstur)

og svört málning. 

Ég byrjaði á því að strika upp tréin á balsaviðinn með reglustikunni. 

Því næst sker ég eftir línunum. Ég nota reglustikuna til þess að skera meðfram svo allt verði beint. Passa þarf líka að vera með gott skurðarbretti undir. 

Þar sem ég keypti 2mm balsa þá geri ég svona "rennur" uppi og niðri sem eru nákvæmlega 2mm. á breidd. Rennurnar ná niður í miðju á trénu. 

Svo er það bara að skreyta. 

Ég notaði reglustikuna og blýantinn til að teikna fyrst það sem ég ætlaði að mála og fór með svarta línutússinu í útlínurnar og málaði svo innan línanna. 

Svolítil þolinmæðisvinna ef fólk vill hafa þetta eitthvað flúrað, en gaman. 

Gangi ykkur vel :) 

Jóla-pakka dagatal.

Ég er þessa dagana að undirbúa pakkadagatal fyrir börnin mín. Ég hef aldrei gert svona pakkadagatal áður, en mig hefur alltaf langað til þess. Núna ætla ég að prufa þetta sjá hvernig þetta gengur. Það eina sem ég er búin að gera er að kaupa hluta af pökkunum, pakka þeim inn og merkja.... og nú er ég að velta fyrir mér uppsetningu og hvar ég vil hafa herlegheitin. 

Ég held að einn veggur í stofunni verði fyrir valinu og líklega mun ég nota svona frekar þykka grein, jólaljós og band í þetta. 

Mig langar svo í svona röndótt pakkabönd... veit einhver hvar ég fæ svoleiðis? (svona eins og er hér á myndinni fyrir ofan... svart og hvítt eða rautt og hvítt)

En endilega skoðið myndirnar sem ég hef sankað að mér...vonandi fáið þið innblástur og gerið skemmtilegt pakkadagatal ;) 

Ef þið gerið eitt slíkt þá megið þið alveg endilega senda mér myndir af ykkar útfærslu. Það væri gaman!

Jóla Jóla...

Jæja... það er kominn tími til að skella í eina færslu eða svo. Nú fer ég að verða svolítið virkari á blogginu.  Svona aðallega af því að ég er svo mikið jólabarn...en líka útaf því að ég hef örlítið minna að gera í skólanum mæstu 2-3 vikur :)  Skólinn hefur verið að kæfa mig síðustu 3 vikurnar svo það verður voða gott að geta farið að hugsa um bloggið, jólin og skemmtilega og fallega tíma sem eru framundan.

Líklega eru margar húsmæður farnar að iða í skinninu að fara setja upp jólaljósin og gera jólakósý. Aðventan verður komin áður en við vitum af svo það er ekki seinna vænna að fara að plana aðventukransinn.  

Hér fyrir neðan eru nokkrar skemmtilegar hugmyndir að aðventu"kransi" sem má nýta í sína eigin kransagerð. - könglar og mosi eru frítt hráefni sem hægt er að nálgast í flestum skógum landsins. :) 

Á neðstu myndinni má sjá kransinn sem ég gerði sjálf í fyrra. Ég notaði gamalt kökuform frá mömmu minni og mér þótti mjög vænt um að hafa það uppi við öll jólin :) 

Það leynist oft eitthvað sniðugt uppí hillu og inní skápum sem má nota í kransinn... eitthvað óhefðbundið og persónulegt sem gerir kransinn fallegri fyrir vikið. 

Vonandi veita þessar hugmyndir ykkur einhvern innblástur í ykkar eigin kransagerð :) 

Nýársmottan

Á gamlárs þá föndruðum við Nína Dögg nokkur yfirvaraskegg og festum á rör. 

Við gerðum alls 15 mottur og ég bjó til skapalón og svo var bara strikað eftir og klippt út. 

Það dugaði þó ekki að gata í skeggið eins og er þarna á hvíta skegginu því það hélst illa og var ekki á réttum stað miðað við efri vör... svo við festum yfir rörið þannig að þegar maður drakk úr rörinu þá fékk maður skegg :) 

Þetta var mjög skemmtilegt svona við matarborðið :) 

Gleðilegt nýtt árið 2013!

Ég óska ykkur öllum gleðilegs nýs árs með þökk í hjarta fyrir lestur síðastliðin 8 árin. Ég vona að nýja árið verði ykkur rosalega gott í alla staði og færi ykkur gæfi og hamingju. 

Ég set mér yfirleitt aldrei nein áramótaheit...nema að ég geti staðið við þau :) Ég held að þessi setning hér fyrir neðan sé bara ágætis áramótaheit. Ég hvet alla til að tileinka sér þessi orð. 

Svo heiti ég líka á sjálfa mig að drekka meira af vatni þetta árið og borða hollari mat :) 

Ég setti mér nokkur markmið á áramótunum fyrir ári síðan og hef  náð þeim lang flestum. Öll voru þau frekar auðveld að standa við... eins og t.d. að sjæna stofuna, fara til ameríku og kaupa gardínur fyrir stofugluggana... en þetta síðastnefnda er enn eftir. Það gerist á árinu 2013 :) 

Áramótapartýið 2012

Síðasti dagur ársins er á morgun. Mörgum hlakkar mikið til... þá sérstaklega litlu gröllurunum okkar, því fjölskyldu partý og sprengjur, bæði inni sem úti heilla mikið :) 

Margir kvíða þó fyrir nýjum tímum...og ég hef sjálf verið í þeim sporum eitt sinn. En nú tek ég nýjum tímum fagnandi...því lífið er oft svo spennandi og skemmtilegt :) 

Við Nína Dögg, 7ára dóttir mín vorum að tala um að gera svona yfirvaraskegg fyrir annaðkvöld til að taka með í partýið hjá Jóhönnu systir. 

Kannski að maður splæsi í gleraugu og slaufur líka?? :) 

Það sem þarf er þessa aðgerð eru: 

Skæri

rör

karton

grillpinnar

lím. 

Ekkert mál og tekur enga stund :) 

Áramótaundirbúningur - "spregjur" á matarborðið

Spenningurinn fyrir áramótunum er komin í hvert íslenskt barns-blóð og mikið um sprengjur núna hér og þar. Skemmtilegir áramótahattar og fallegt skraut ásamt óvæntum glaðningum og besta fólkinu manns :)  Ásamt auðvitað góðum mat, skemmtilegu skaupi og rosalegum sprengju. Er þetta ekki sirka svona hjá öllum? 

Hér eru smá leiðbeiningar um hvernig má gera sjálfur svona sprengjur á matarborðið. Og jafnvel setja eitthvað aðeins meira spennandi inn í þær fyrir börnin en yfirleitt er ;) Þetta er ekki svo mikið mál.