Hreiðurgerð

Nú er viðburðaríku sumri lokið og haustið gengið í garð. Síðan ég bloggaði síðast hefur eitt barn bæst í hópinn hér á heimilinu og öllum heilsast bara nokkuð vel. Ég sest minna niður fyrir framan tölvu en áður svona til að byrja með á meðan allt er að detta í rétta rútínu og við lærum að eiga þrjú börn. 

En mig langaði til að sýna ykkur skiptiaðstöðuna mína. Í húsinu okkar er lítið rými inni í svefnherberginu okkar á milli skápa. Líklega hugsað fyrir spegil og snyrtiborð en við höfðum ekki gert neitt við þetta rými síðan við fluttum inn fyrir ári síðan. Hundarnir okkar fengu að hafa það útaf fyrir sig til að byrja með en núna hefur það fengið nýtt hlutverk. Við ákváðum að máta skiptiborðið þarna inní þetta litla horn og það passaði líka svona rosa fínt. Húsbóndinn málaði vegginn og ég fékk að dúlla við rest :) 

Skiptiborðið sjálft keypti ég notað en það er úr Ikea. Því miður er það hætt í sölu þrátt fyrir að vera ótrúlega fallegt. En ég þræddi sölusíður og fékk það að lokum ;) 

Skiptidýnuna og óróann fékk ég í Petit.is barnavöruverslun en fiðrildin bleiku átti ég til. 

Bæði skiptidýnan og óróinn eru frá sænsku merki sem nefnist Farg & Form sem Petit.is selur en skýin eru einskonar einkenni merkisins.  Mikið af fallegum vörum koma frá þessu merki bæði í fatnaði og öðrum nauðsynjavörum fyrir börnin :)  Endilega kíkið á Petit...þið verðið ekki svikin ;) 

Le Wedding!

Þá er brúðkaupið búið... reyndar komnar alveg tvær vikur síðan...en bleika skýið svífur enn ;) 

En það sem þetta var gaman! ÓMÆ ÓMÆ! Ég held við komumst aldrei yfir þennan dag...enda draumur í dós frá upphafi til enda. En ég ætla aðeins að segja ykkur frá undirbúningnum og hverjir komu að þessu með okkur. 

Dæturnar tvær teiknuðu okkur hjónin fyrir boðskortið sem ég var semi búin að hanna en fékk það ekki til að vera eins og ég vildi hafa það þannig að ég gafst upp og fékk þær í Reykavík Letterpress til þess að klára boðskortið fyrir okkur. Við vorum að sjálfsögðu ekki svikin þar. Hér fyrir ofan og neðan sjáið þið fram og bakhlið boðskortsins. 

Veislan var haldin á bænum Fitjum í Skorradal. Draumastaðsetning í sveitasælunni þar sem gestir gátu gist á tjaldstæðinu alla helgina ef þeim hugnaðist það. Mjög margir nýttu sér það og því varð úr 3. daga veisla frá föstudegi til sunnudags ;) 

Á borðunum í veislunni var ég með innrammað instagram bingó sem ég gerði sjálf. Það var ekki að spyrja að því að húsmæðraskóla vinkonur mínar tóku bingóinu mjög alvarlega og unnu þetta með stæl.  Hvert einasta móment náðist á filmu og það er frábært að skoða þessar myndir eftirá. 

Mæli hiklaust með þessum leik ;) 

Greiðsluna gerði Marín besta vinkona mín en hún rekur hárgreiðslustofuna Hár-studio á Akranesi og er mjög fær í því sem gerir ;) 

Krissý Ljósmyndari tók fyrir okkur myndirnar og hún var með okkur allt frá undirbúningi þar sem við vorum að klæða okkur í fötin allt til þess að kakan hafði verið borðuð. Ég er búin að frá nokkrar myndir frá henni og er mjög ánægð með útkomuna....þó að óléttuandlitið á mér mætti nú hafa verið minna óléttulegt hehe.. ;) 

Hér fyrir neðan má sjá 4 myndir frá henni sem hún tók þennan skemmtilega dag ;)

Krissý er alveg með á hreinu hvernig best er að haga myndatökunni og stjórnar þessu léttilega í samræmi við brúðhjón (brúður) þannig að mómentin náist. Hún hefur mjög gott auga fyrir fallegum myndum og ég get alveg hiklaust mælt með henni :)

Kjólinn minn hannaði og saumaði fatahönnuðurinn Brynja Emils en Brynja hannar undir merkinu Besla. Ég mátaði þónokkra kjóla og mér fannst ég eins og flóðhestur í þeim öllum þannig að það kom ekkert annað til greina hjá mér en að láta sauma á mig kjól þar sem bumban er að taka svolítið til sín en ég vildi ekki hafa kjólinn of íburðamikinn. Við Brynja fundum þetta fallega antik-bleika satín í Vouge og það var ekki aftur snúið ;) Kjóllinn kláraðist deginum fyrir brúðkaup...smá stress en það verður að vera stress með á svona stundum. Ég er og var mjög ánægð með útkomuna á kjólnum enda er Brynja algjör snillingur ;) 

Borðaskreytingarnar sá ég sjálf um að útfæra og ég spilaði bara mjög út frá fallega veislusalnum sem að er á Fitjum. Sveitarómantíkin var allsráðandi og systur mínar og vinkonur þrusuðu upp salnum með mér í einum grænum með bros á vör. 

Kökuna fengum við svo í Mosfellsbakaríi. Hún var hrikalega góð og afskaplega falleg. Brúðhjónin ofaná kökuna komu úr dótakassanum hjá dætrunum en planið var að hafa enga styttu ofaná kökunni en svo rakst ég á þessi fallegu brúðhjón í einni tiltektinni og fékk þá hugmyndina að því að nota þau ;) Það kom mjög vel út :) 

Páskarnir og Instagram

Páskarnir voru bara dásamlegir hér á bæ. Ég byrjaði páskafríið á dásamlegu brúðkaupi hjá vinum, því næst fékk ég fallega vinkonuhópinn minn í heimsókn eina kvöldstund svo fór ég með börnum og burtu vestur í Dalina í tvær nætur að njóta náttúrunnar (tók engar myndir því ég lyfti hvorki upp myndavél né síma allan tímann....var bara að njóta) og svo var það home sweet home með fjölskyldunni yfir hátíðina sjálfa. Heimilið var mjög gult og sumarlegt þessa daga eins og myndirnar bera með sér en eiginlega allt páskaskraut sem til er á heimilinu hefur komið heim af leikskólanum með börnunum. Uppáhalds páskaskrautið er að sjálfsögðu eftir dóttur mína en það eru páskaliljur gerðar úr eggjabökkum. Ótrúlega fallegar ;) 

Ég tók nokkrar myndir yfir páskana og setti á Instagram síðu hugmyndasvampsins en ef þið eruð á Instagram þá getið þið elt mig hér. 

Ég vona að þið hafið átt ljúfa páska líka ;) 

Eldhúsið komið í páskagírinn

Bragðgóðar páska-bollakökur

og

uppáhalds páskaliljurnar eftir Heklu Dís í vinsælasta vasa landsins ;) 

Hönnunarmars 2015 - Smíðagripir

Smíðagripir eru stólar/barstólar hannaðir og smíðaðir af myndlistamanninum Daníeli Magnússyni. 

Daníel hóf að smíða þessa fallegu stóla fyrir um 23 árum síðan en stólarnir hafa notið töluverðra vinsælda síðustu árin. Stólana hans má meðal annars finna á 101 bar, Listasafni Reykjavíkur og á nýja vínbarnum í flugstöðinni okkar íslendinga... og svo má líka finna þá í eldhúsinu hjá mér ;) 

Smíðagripir eins og Daníel kýs að kalla stólana sína eru einkar þæginlegir en þeir eru allir á fjórum fótum og með snúanlegri sessu. Þeir eru ekki valtir og verða ekki grút skítugir neðst á fótum eins og svo margir barstólar verða. 

Daníel smíðaði fyrir mig fjóra stóla fyrir um ári síðan og ég get ekki sagt annað en þjónustan hafi alveg verið skemmtilega einstök. Við hjúin fengum að koma við á verkstæðinu hjá honum og hann útskýrði fyrir okkur hvernig allt saman virkar í stólnum (snúnings skífan og fleira) og við völdum hvernig fætur við vildum og hvaða viðartegund við vildum. Síðan fórum við í GÁ húsgögn og völdum okkur leður á sessuna og svo þremur vikum seinna voru tilbúnir fjórir handsmíðaðir fallegir stólar, merktir okkur hjúum undir og framleiðslunúmer á hverjum og einum. 

Mína stóla má skoða á síðustu tveimur myndunum hér fyrir neðan. 

Smíðagripir eru nú til sýnis á Hönnunarmars en þá má finna í Kirsuberjatrénu á Vesturgötunni

Hér fyrir neðan má svo sjá opnunartíma sýningarinnar í Kirsuberjatrénu um helgina.

Nýtt en notað stöff :)

Um liðna helgi datt ég í lukkupottinn... en þá hringdi vinkona í mig sem hafði fjárfest í Kartell náttborði á barnalandi en henni fannst það ekki passa inni hjá sér og því hafði hún samband við mig. 

Að sjálfsögðu sagði ég JÁ! Enda hef ég verið að hugsa um að fjárfesta í þessu blessaða náttborði ansi lengi... hugsa og hugsa og hugsa....en aldrei framkvæmt kaupin. Enda er ég viss um að þetta borð sé syndsamlega dýrt beint úr búðinni. En ég gat samt hugsað náttborðið til mín og það passar svona rosalega fínt ;) 

Ég er allvega helsátt... 

...og nú ætla ég að fara að hugsa til mín Polder sofa eftir Hella Jongerius :) 

Marmari á Antikmarkaði

Um helgina kíkti ég á hinn margumbloggaða antikmarkað hér á Skaganum. Skemmtilegasta antikmarkað landsins þó víðar væri leitað. Þar fann ég þennan fallega marmaradisk á snúningshjóli...vei!  Og ég keypti hann á heilar 1800 kr. hvorki meira né minna... ! Aðeins ódýrara en í búðinni.... og alveg jafn fallegur ;) Mig hefur lengi langað í einn svona en ekki fundið þann eina rétta...fyrr en núna ;) 

Í sumar ætlar Antikmakaðurinn að vera með bás á matarmarkaði sem haldinn verður allar helgar frá og með 17. júní. og fram að ágústmánuði. Þegar þessir skemmtilegu markaðir byrja verður sko komin góð ástæða til þess að fá sér rúnt á Akranes, kaupa ferska vöru beint frá bónda, eitthvað gott frá Galito að sjálfsögðu (verður með bás líka), og eitthvað fallegt frá Antikbúðinni ;) 

Ég minni á að Akranes er ekki nema um 35 km frá Ártúnshöfða eða svo... ekki langt skal ég segja ykkur ;)

Food & Fun 2014

Við kæróinn lögðum leið okkar á Vox Restaurant í gærkvöldi til þess að borða á Food & Fun matarhátíðinni sem haldin er árlega.  Á Vox var Norðmaðurinn Sven Erik Renaa að kokka en hann bauð uppá 5 mjög góða rétti. En Sven var einmitt valinn matreiðslumaður hátíðarinnar í ár. 

Það vill svo skemmtilega til að Hilmar (kæróinn) er kokkur og hefur unnið á sama stað og Sven í Noregi, á Gastronomisk Institutt, en Hilmar var þar nokkru áður en Sven vann þar. Þannig að þeir gátu örlítið bondað og áttu sameiginlega vini úr kokkageiranum í Noregi. Sven Erik rekur sinn eigin veitingastað í Stavanger sem heitir Renaa Restauranter en staðinn má líka finna í Þrándheimi. Fyrir ykkur íslendingana úti í Noregi þá bara verðið þið að gefa ykkur tíma í að fá ykkur að borða hjá honum. Þvílíkt góður matur sem maðurinn gerir :) Ég er alveg viss um að þið verðið ekki svikin. 

Ég tók myndir af öllum réttunum nema einum en það var humarinn sem ég tók ekki mynd af...því ég fékk ekki þann rétt. Ég má því miður ekki borða humarinn eins leiðinlegt og það nú er. 

1. rétturinn - Amuse bouche (smakk): Norsk risahörpuskel, ígulker, hrogn og piparrótarfroða.

Réttur nr. 2 - Starter: var humarinn sem ég fékk ekki. 

Réttur nr. 3 - Appetizer: Þorskur og þroskhrogn með ótrúlega góðri jurta og hrognasósu. Með þessu var boðið uppá Brokkólí, söl og einhverskonar grænmetisduft. 

Þetta var minn uppáhalds réttur. Rosalega gott!

Hér má sjá Sven Erik í "aksjón" að gera aðalréttina tilbúna. Ég stalst þarna til þeirra til að taka eina mynd :) 

4. rétturinn - Aðalrétturinn var Lamb með jarðskokkum, lakrís, brúnuðu smjöri og sítrónu. - á disknum var tvennskonar lambakjöt, fillet og svo örlítið smakk af lambasíðu sem var mjög gott.

Svo er það 5. og síðasti rétturinn - Desertinn: Skyr-ís, súkkulaðimousse með sultaðri blóðappelsínu og blóðappelsínufroðu og súkkulaðimulning. Með þessu var svo pistasíu-svampur. Rosa gott. :) 

Svo varð auðvitað að fylgja mynd af kokkunum tveimur. Sven Erik Renaa matreiðslumaður hátíðarinnar og Hilmar matreiðslumaðurinn minn :) 

Dagatalið 2014

Ég er búin að hugsa síðan á áramótum að nú sé árið komið sem ég bý til mitt eigið dagatal. Ég hef verið að leita mér að innblæstri hér og þar og svo loks ákvað ég að mitt dagatal yrði að vera svolítið ekta ég. Þar sem Múlalundur hefur "óvart" verið viðriðinn mörg af mínum verkefnum í gegnum tíðina þá fannst mér nú bara alveg sjálfsagt að nota möppuspjald undir dagatalið mitt. 

Og hvenær er besti tíminn til að dunda í dagatali í illustrator ef ekki þegar maður á að vera að læra? Maður spyr sig... ?  

....þannig að, á meðan ég setti saman þetta "ekta ég" dagatal, 

þá beið bara mastersritgerðin mín róleg. 

Þekkir þetta einhver annar en ég?

Hugmyndasvampurinn í Fréttablaðinu.

Blaðamaður Fréttablaðsins hafði samband við mig í síðustu viku til þess að fá að skrifa grein um jólatrén sem ég póstaði hér á blogginu í síðustu viku. Það var bara gaman að einhver vildi fjalla um það sem ég er að gera. Í dag kom svo grein um bloggið og tréð í Lífinu, fylgiriti Fréttablaðsins. Greinin var bara ágæt, nema hvað að þarna var smávegis staðreyndarvilla. Í greininni segir að ég hafi útskrifast sem vöruhönnuður árið 2006 en það herrans ár byrjaði ég einmitt að læra vöruhönnun og ég útskrifaðist árið 2009. En slíkar villur eru víst nokkuð algengar í blöðunum svo þetta er bara allt í lagi. 

Eitt að allavega víst. Og það er að Hugmyndasvampurinn er í jólaskapi :) 

DIY: Jólatré

Ég föndraði þessi skemmtilegu jólatré um síðustu helgi og mér fannst útkoman bara nokkuð góð þó ég segi sjálf frá. Ég var enga stund að skera tréin út en það tók þónokkuð langann tíma að mála þau.

En fyrir ykkur elsku blogglesendur hef ég ákveðið að henda inn smá leiðbeiningum að svona tré. Læk á það er það ekki?  :) 

Til að byrja með þurfið þið kæru föndrarar að gera ykkur ferð í Handverkshúsið. Kaupa þar 2-3mm þykkan balsavið. Viðurinn kemur í 1m lengjum og 1m dugði mér í 3 tré... bara lítil tré. En viðurinn býður ekki uppá að gera stór tré þar sem viðarplöturnar eru alls ekki breiðar. 

Það sem þarf: 

Balsaviður

góð reglustika eða T-stika

dúkahnífur

blýantur

svartur línutúss (fyrir þá sem ætla að gera svart munstur)

og svört málning. 

Ég byrjaði á því að strika upp tréin á balsaviðinn með reglustikunni. 

Því næst sker ég eftir línunum. Ég nota reglustikuna til þess að skera meðfram svo allt verði beint. Passa þarf líka að vera með gott skurðarbretti undir. 

Þar sem ég keypti 2mm balsa þá geri ég svona "rennur" uppi og niðri sem eru nákvæmlega 2mm. á breidd. Rennurnar ná niður í miðju á trénu. 

Svo er það bara að skreyta. 

Ég notaði reglustikuna og blýantinn til að teikna fyrst það sem ég ætlaði að mála og fór með svarta línutússinu í útlínurnar og málaði svo innan línanna. 

Svolítil þolinmæðisvinna ef fólk vill hafa þetta eitthvað flúrað, en gaman. 

Gangi ykkur vel :) 

Fyrir/ eftir - Stofuveggurinn.

Ég keypti þennan fagra gamla skenk fyrr á þessu ári og hef verið að velta veggnum fyrir ofan skenkinn mikið fyrir mér. Vildi ég setja hillur eða vildi ég hengja upp myndasafn, mála vegginn í lit eða ekki...? Miklar pælingar og ég er búin að sofa ansi mikið á þessu. Nú nýlega ákvað ég að hengja upp samansafn af fallegum myndum og skrauti eftir ættingja, íslenska listamenn og hönnuði. 

Hér fyrir ofan má sjá hvernig veggurinn hefur verið nánast frá því að skenkurinn var keyptur og fyrir neðan má sjá hvernig hann er núna. 

Stóra myndin með rauða hestinum er eftir Nínu Dögg dóttir mína en hún málaði þessa mynd þegar hún var 4 ára að verða 5 ára gömul í leikskólanum. Ég heillaðist strax af þessari mynd og lét ramma hana inn *stolt*.  Brúna spýtan vinstra megin við stóru myndina (sést betur hérna fyrir neðan) er spýta sem ég fékk að eiga hjá steinsmiðjunni S. Helgason í einhverri heimsókninni þangað. Spýtan hefur fylgt mér í nokkur ár en aldrei átt neinn sérstakan samastað þar til núna. Ég elska hana svolítið mikið. 

Hvíti diskurinn fyrir neðan spýtuna er eftir ungan sænskan hönnuð og hefur að geyma spor eftir fugl sem borðaði af disknum. Jón í lit trónir þarna efst fyrir ofan fallegu myndina eftir Unni Jónsdóttur listakonu. Málverkið í brúnu tónunum er svo eftir hann fænda minn Vigni Jóhannson listmálara en myndirnar hans fást m.a. í Gallerí List í Skipholtinu. Myndin sem er innrömmuð með gulu límbandi á vegginn er mynd sem fylgdi með einhverju blaði sem ég keypti.