Páskarnir og Instagram

Páskarnir voru bara dásamlegir hér á bæ. Ég byrjaði páskafríið á dásamlegu brúðkaupi hjá vinum, því næst fékk ég fallega vinkonuhópinn minn í heimsókn eina kvöldstund svo fór ég með börnum og burtu vestur í Dalina í tvær nætur að njóta náttúrunnar (tók engar myndir því ég lyfti hvorki upp myndavél né síma allan tímann....var bara að njóta) og svo var það home sweet home með fjölskyldunni yfir hátíðina sjálfa. Heimilið var mjög gult og sumarlegt þessa daga eins og myndirnar bera með sér en eiginlega allt páskaskraut sem til er á heimilinu hefur komið heim af leikskólanum með börnunum. Uppáhalds páskaskrautið er að sjálfsögðu eftir dóttur mína en það eru páskaliljur gerðar úr eggjabökkum. Ótrúlega fallegar ;) 

Ég tók nokkrar myndir yfir páskana og setti á Instagram síðu hugmyndasvampsins en ef þið eruð á Instagram þá getið þið elt mig hér. 

Ég vona að þið hafið átt ljúfa páska líka ;) 

Eldhúsið komið í páskagírinn

Bragðgóðar páska-bollakökur

og

uppáhalds páskaliljurnar eftir Heklu Dís í vinsælasta vasa landsins ;) 

Hönnunarmars 2015 - Smíðagripir

Smíðagripir eru stólar/barstólar hannaðir og smíðaðir af myndlistamanninum Daníeli Magnússyni. 

Daníel hóf að smíða þessa fallegu stóla fyrir um 23 árum síðan en stólarnir hafa notið töluverðra vinsælda síðustu árin. Stólana hans má meðal annars finna á 101 bar, Listasafni Reykjavíkur og á nýja vínbarnum í flugstöðinni okkar íslendinga... og svo má líka finna þá í eldhúsinu hjá mér ;) 

Smíðagripir eins og Daníel kýs að kalla stólana sína eru einkar þæginlegir en þeir eru allir á fjórum fótum og með snúanlegri sessu. Þeir eru ekki valtir og verða ekki grút skítugir neðst á fótum eins og svo margir barstólar verða. 

Daníel smíðaði fyrir mig fjóra stóla fyrir um ári síðan og ég get ekki sagt annað en þjónustan hafi alveg verið skemmtilega einstök. Við hjúin fengum að koma við á verkstæðinu hjá honum og hann útskýrði fyrir okkur hvernig allt saman virkar í stólnum (snúnings skífan og fleira) og við völdum hvernig fætur við vildum og hvaða viðartegund við vildum. Síðan fórum við í GÁ húsgögn og völdum okkur leður á sessuna og svo þremur vikum seinna voru tilbúnir fjórir handsmíðaðir fallegir stólar, merktir okkur hjúum undir og framleiðslunúmer á hverjum og einum. 

Mína stóla má skoða á síðustu tveimur myndunum hér fyrir neðan. 

Smíðagripir eru nú til sýnis á Hönnunarmars en þá má finna í Kirsuberjatrénu á Vesturgötunni

Hér fyrir neðan má svo sjá opnunartíma sýningarinnar í Kirsuberjatrénu um helgina.

Hvað er náttúrulegra heimili?

Nú ætla ég að reyna að koma eftirfarandi frá mér, án þess að það hljómi eins og fiðrildaprump og grænar hljóðbylgjur.

Fyrir skömmu var stofnaður hópur á Facebook, Náttúrulegra heimili.
Nafnið segir sig sjálft en þetta er eitthvað sem ég fór ekki að spá í af neinni alvöru fyrr en ég eignaðist barn. Vilja ekki allir það besta fyrir börnin sín? -Það besta er ekki það dýrasta.
Það er til aragrúi af álíka hópum en ég hef ekki fundið neinn á íslensku, fyrir íslenskar aðstæður.
Það er alltaf gaman að vera í félagsskap fólks sem spáir í svipuðum hlutum og þú. Það er enn skemmtilegra að vera í hópi sem hefur hvetjandi áhrif á þig.
Þrátt fyrir að hópurinn sé nýr ennþá þá hefur margt skemmtilegt og fræðandi verið rætt um. Þú þarft ekki að vera græn/n í gegn til að vera með.

Maíspokarnir sem eru nú loksins að birtast sem valmöguleiki í stað plast innkaupapoka við kassa í mörgum af stóru matvöruverslununum hafa verið ræddir.

Meðlimir hafa líka deilt uppskriftum af uppáhalds DIY hreinlætisvörunum sínum og það á eflaust margt eftir að bætast við. Ég er mjög spennt að prófa uppskrift af þessum líkamsskrúbbi:

Að "vera grænni" snýst ekki bara um að þvo ruslið og stafla því saman í eldhúsinu.
Það er hægt að gera svo miklu meira OG þú gætir bætt heilsuna og sparað í leiðinni. Því fylgir líka góð tilfinning, að finnast þú vera að gera eitthvað örlítið betur. Fyrir utan það að kenna börnunum betri siði.

- Borða betri mat og minnka aukaefnin sem heimilisfólkið þitt innbyrðir

• Að gefa sér aðeins meiri tíma í að útbúa matinn frá grunni.

- Nota hreinni hreinsivörur fyrir heimilið og líkamann

• Geturðu borið fram öll efnin sem snerta húðina á hverjum degi?

• Finnst þér það í lagi?

- Nota þína eigin orku meira til að komast á milli staða þegar þú getur, í stað bílsins.

• Hitaeiningar í stað mengunar

- Kaupa notaða hluti og gera að þínum eigin

Þú þarft ekki að gera allt í einu. Margt smátt gerir eitt stórt og allt það.
Það er alltaf gott að muna að góður göngutúr byrjar á einu skrefi.

Marmari á Antikmarkaði

Um helgina kíkti ég á hinn margumbloggaða antikmarkað hér á Skaganum. Skemmtilegasta antikmarkað landsins þó víðar væri leitað. Þar fann ég þennan fallega marmaradisk á snúningshjóli...vei!  Og ég keypti hann á heilar 1800 kr. hvorki meira né minna... ! Aðeins ódýrara en í búðinni.... og alveg jafn fallegur ;) Mig hefur lengi langað í einn svona en ekki fundið þann eina rétta...fyrr en núna ;) 

Í sumar ætlar Antikmakaðurinn að vera með bás á matarmarkaði sem haldinn verður allar helgar frá og með 17. júní. og fram að ágústmánuði. Þegar þessir skemmtilegu markaðir byrja verður sko komin góð ástæða til þess að fá sér rúnt á Akranes, kaupa ferska vöru beint frá bónda, eitthvað gott frá Galito að sjálfsögðu (verður með bás líka), og eitthvað fallegt frá Antikbúðinni ;) 

Ég minni á að Akranes er ekki nema um 35 km frá Ártúnshöfða eða svo... ekki langt skal ég segja ykkur ;)

Barstóla pælingar.

Jæææææææjjjja.... nú hef ég LOKSINS endurheimt líf mitt aftur eftir skil á masters ritgerð :) Jeijjj!!!
Ég hef ekki litið uppúr ritgerðarskrifum síðan um miðjan mars mánuð sem er skýringin á því að bloggið hefur legið svona nokkurnvegin í dvala. Enda ætla ég mér að útskrifast úr þessum skóla þessa önnina. :)  Nú á ég bara eftir að skila tveimur einingum í hús og þá er ég komin með allar þær einingar sem ég þarf til að útskrifast...og þessar tvær sem eftir eru eru nú bara pís of keik miðað við ritgerðarbrjálæðið sem nú er loks yfirstaðið. Skrítið samt hvað maður er eitthvað tómur í hjartanu eftir að hafa skilað þessari ritgerð.... í gær upplifði ég meiriháttar samviskubit yfir því að hafa skilað og sú hugsun réðst hart á mig að ég hefði gleymt einhverju... mjög óþæginlegt. Svona er maður skrítin...

En...að örðu... Núna má ég loksins hugsa um þá hluti sem ég hef ekki leyft mér að hugsa um síðustu mánuði. Ég er að fara að eignast nýtt eldhús... reyndar nýtt hús veijj!! ... en já...nýtt eldhús með eyju ;) Svolítið draumaeldhús. Við eldhúseyjuna þarf að setja sirka 3 barstóla og að velja fallega og sniðuga barstóla getur verið ansi flókið skal ég segja ykkur. Ég þekki ansi marga sem eiga barstóla og hef því ákveðnar skoðanir hvað ég vil og hvað ég vil ekki hafa á mínum stólum.
Ég vil ekki hafa stóra plötu undir stólfætinum, uppá þrif er betra að hafa fjórar fætur.
Ég vil helst hafa snúnings sessu (þó að það sé nánast ekki raunhæft ef maður ætlar að hafa fjórar fætur).
Ég vil hafa bólstraða sessu.
Mig langar helst að hafa einhvern við - eik eða hnotu-  í stólnum.

Já... þetta er flókið... og það leit allt út fyrir að þessi stóll væri ekki til...þangað til í gær. Þegar ég fór að leita og leita á netinu, þá fann ég stóla eftir hönnuðinn Daníel Magnússon.
Daníel er listamaður en hefur líka verið að hanna stóla fleira skemmtilegt. Stólana hans má m.a. finna á barnum á 101 Hótel.

En það eru nokkrir stólar sem ég hef fundið nú þegar hér á landi sem koma til greina.... mis dýrir en allir fallegir. Nú væri gott ef maður gæti skit... peningum. ;)

Stóllinn eftir Daníel Magnússon. 

Barstóll frá GÁ húsgögnum. 

Ilva

Casa

Modern

Húsgagnahöllin

Modern

Eldhúsdraumar

Jæææja.... Það sést augljóslega á blogginu mínu að ég er í skóla. Að skrifa mastersritgerð. Skemmtilegt!

Ég hef ekki haft neinn tíma fyrir hönnun, heimili né fegurð. Og ég viðurkenni það með miklum trega að ég skrópaði á HönnunarMarsinn... já..... skrópaði... allt þessari ritgerðardruslu að kenna. Ég hef aldrei látið mig vanta á HönnunarMarsinn áður.. og ég grét inní mér útaf þessu. En svona er lífið...og nú er ég að fara að sjá fyrir endann á þessari ritgerð og þá getur lífið aftur farið að rúlla sinn vanagang. 

En það sem ég er að skoða mikið þessa dagana (í ritgerðarpásum) eru barstólar. Háir stólar til þess að hafa við eyju. Ég hef líka verið að skoða mikið eldhús og eyjur, uppröðun og annað....  

En hér fyrir neðan eru nokkrar flottar eldhúsmyndir með fallegum barstólum til þess að láta sig dreyma um :) 

Ég lofa svo að taka við mér og blogga eins og vindurinn þegar þessi ágæta ritgerð verður yfirstaðin... úff... 

Food & Fun 2014

Við kæróinn lögðum leið okkar á Vox Restaurant í gærkvöldi til þess að borða á Food & Fun matarhátíðinni sem haldin er árlega.  Á Vox var Norðmaðurinn Sven Erik Renaa að kokka en hann bauð uppá 5 mjög góða rétti. En Sven var einmitt valinn matreiðslumaður hátíðarinnar í ár. 

Það vill svo skemmtilega til að Hilmar (kæróinn) er kokkur og hefur unnið á sama stað og Sven í Noregi, á Gastronomisk Institutt, en Hilmar var þar nokkru áður en Sven vann þar. Þannig að þeir gátu örlítið bondað og áttu sameiginlega vini úr kokkageiranum í Noregi. Sven Erik rekur sinn eigin veitingastað í Stavanger sem heitir Renaa Restauranter en staðinn má líka finna í Þrándheimi. Fyrir ykkur íslendingana úti í Noregi þá bara verðið þið að gefa ykkur tíma í að fá ykkur að borða hjá honum. Þvílíkt góður matur sem maðurinn gerir :) Ég er alveg viss um að þið verðið ekki svikin. 

Ég tók myndir af öllum réttunum nema einum en það var humarinn sem ég tók ekki mynd af...því ég fékk ekki þann rétt. Ég má því miður ekki borða humarinn eins leiðinlegt og það nú er. 

1. rétturinn - Amuse bouche (smakk): Norsk risahörpuskel, ígulker, hrogn og piparrótarfroða.

Réttur nr. 2 - Starter: var humarinn sem ég fékk ekki. 

Réttur nr. 3 - Appetizer: Þorskur og þroskhrogn með ótrúlega góðri jurta og hrognasósu. Með þessu var boðið uppá Brokkólí, söl og einhverskonar grænmetisduft. 

Þetta var minn uppáhalds réttur. Rosalega gott!

Hér má sjá Sven Erik í "aksjón" að gera aðalréttina tilbúna. Ég stalst þarna til þeirra til að taka eina mynd :) 

4. rétturinn - Aðalrétturinn var Lamb með jarðskokkum, lakrís, brúnuðu smjöri og sítrónu. - á disknum var tvennskonar lambakjöt, fillet og svo örlítið smakk af lambasíðu sem var mjög gott.

Svo er það 5. og síðasti rétturinn - Desertinn: Skyr-ís, súkkulaðimousse með sultaðri blóðappelsínu og blóðappelsínufroðu og súkkulaðimulning. Með þessu var svo pistasíu-svampur. Rosa gott. :) 

Svo varð auðvitað að fylgja mynd af kokkunum tveimur. Sven Erik Renaa matreiðslumaður hátíðarinnar og Hilmar matreiðslumaðurinn minn :) 

Marmara ást

Ég er eitthvað svo yfir mig spennt fyrir marmara þessa dagana. Ég bara nánast ræð ekki við mig þegar ég skoða myndir og læt mig dreyma um þessa rándýru steintegund. 

Þess vegna voðalega heppin þegar ég kíkti í Búkollu - nytjamarkað í síðustu viku. Ég rakst á þessa agnarsmáu og ótrúlega fallegu marmarakrukku sem má sjá hér á myndinni fyrir ofan. Hjartað á mér tók smá auka kipp þegar ég tók krukkuna sem kostaði aðeins 250kr. Kostakaup á fallegri vöru. Krukkan fékk það hlutverk að geyma saltflögur við hliðiná piparkvörninni við eldamaskínuna mína og hefur mikið verið notuð á þessum stutta tíma sem ég hef átt hana. Fyrir ykkur hin þá var til önnur svona sem ég tók ekki vegna þess að það var örlítið búið að kvarnast uppúr henni. Sumir setja það svosem ekki fyrir sig... það var ekki mikið kvarn. 

En afþví ég er með marmara ást þá læt ég fylgja nokkrar fallegar myndir af marmara á heimilum. 

Ég er sjúk í flísarnar hér á myndinni fyrir neðan!

Royal Copenhagen / Blue Denmark.

Ég safna þessu stelli sem sést hér á myndunum fyrir ofan og neðan. Ég á/safna matarstellið sem hefur verið keypt alltaf jafn óðum í Búsáhöldum í Kringlunni. En svo hef ég líka komist yfir nokkra gamla muni úr þessu fallega stelli og í lok síðasta árs komst ég yfir einn fallegann bolla og stórt fat undir kjöt. Þessa muni komst ég yfir í bílskúrs/antik sölunni sem ég hef svo oft nefnt hér áður. Konan sagði við mig þegar ég keypti plattann að þetta væri með original stimplinum. En þá fór ég að hugsa og hef hugsað svolítið síðan. Hvað er orginal stimpillinn og er verið að selja eitthvað fake?

Matarstellið mitt sem ég hef keypt reglulega í Búsáhöldum hefur stimpilinn Johnson Bro's, England 1883 - Blue Denmark. En Antik keramikið sem ég á og sést hér á næstu mynd fyrir neðan hefur aðra sögu að segja. Fatið mitt hefur Furnivals víkingaskips stimpilinn sem eftir minni grennslan er framleitt af Furnivals í Englandi frá árinu 1880 - 1963 en þá fór Furnivals á hausinn. Furnivals framleiddi Blue Danmark eða Danmark línuna sem er þetta munstur sem er byggt á munstri sem dönsk postulínsframleiðsla framleiddi á 18. öld. En munstrið á sér miklu lengri sögu. 

Það var maður að nafni Frantz Heinrich Muller sem hóf framleiðslu á þessu munstri í postulín einhverntímann á árunum 1776 - 1779 í Kaupmannahöfn en munstrið kom hann með heim frá Þýskalandi eftir að hafa farið þar um og heimsótt postulínsverksmiðjur. Munstrið varð þá þekkt sem Danska munstrið. Muller þróaði bláa litinn sem þótti fallegur og varan hans varð strax vinsæl. Fyrirtækið fór hinsvega á hliðina en var bjargað fjárhagslega af Christian VII konungi danaveldis og fékk þá fyrirtækið nafnið Royal Copenhagen. 

En í Þýskalandi hefur munstrið líka verið framleitt. Örlítið öðruvísi munstur en samt það lítið öðruvísi að það sést varla. Blöð blómanna eru ekki lituð og munsturs dúllan efst er ekki. Þessi framleiðsla kallast Jager Eiseinberg Original Blau Saks. Kannski er það þetta sem er upprunalega munstrið sem að Muller kom með heim frá Þýskalandi og betrumbætti í Danmörku? 

Bollinn hægrameginn á myndindinni hér fyrir neðan er einmitt merktur Jager Eisenberg og kemur frá Þýskalandi. En framleiðsla á þessu stelli eins og það lítur út þarna var frá árinu 1869 - 1973 undir merkinu Jager Eisenberg. Áður var munstrið í framleiðslu óþekkts merkis þar í landi. 

Eftir minni eftirgrennslan þá virðist sem að Furnivals og Royal Copenhagen hafi verið í einhversskonar samstarfi. Eftir að Furnivals fór á hausinn tel ég líklegt að Johnson Bro's hafi tekið við framleiðslunni (eða eitthvað annað fyrirtæki komið þarna inn á milli...veit ekki alveg).

Sagan segir samt að uppruni munstursins komi upphafleg frá Kína löngu fyrr. Hver veit? 

Fyrir ofan: Furnivals

Fyrir neðan: Jager Eisenberg.

Ýmislegt hér fyrir neðan læt ég mig dreyma um ;)