Hreiðurgerð

Nú er viðburðaríku sumri lokið og haustið gengið í garð. Síðan ég bloggaði síðast hefur eitt barn bæst í hópinn hér á heimilinu og öllum heilsast bara nokkuð vel. Ég sest minna niður fyrir framan tölvu en áður svona til að byrja með á meðan allt er að detta í rétta rútínu og við lærum að eiga þrjú börn. 

En mig langaði til að sýna ykkur skiptiaðstöðuna mína. Í húsinu okkar er lítið rými inni í svefnherberginu okkar á milli skápa. Líklega hugsað fyrir spegil og snyrtiborð en við höfðum ekki gert neitt við þetta rými síðan við fluttum inn fyrir ári síðan. Hundarnir okkar fengu að hafa það útaf fyrir sig til að byrja með en núna hefur það fengið nýtt hlutverk. Við ákváðum að máta skiptiborðið þarna inní þetta litla horn og það passaði líka svona rosa fínt. Húsbóndinn málaði vegginn og ég fékk að dúlla við rest :) 

Skiptiborðið sjálft keypti ég notað en það er úr Ikea. Því miður er það hætt í sölu þrátt fyrir að vera ótrúlega fallegt. En ég þræddi sölusíður og fékk það að lokum ;) 

Skiptidýnuna og óróann fékk ég í Petit.is barnavöruverslun en fiðrildin bleiku átti ég til. 

Bæði skiptidýnan og óróinn eru frá sænsku merki sem nefnist Farg & Form sem Petit.is selur en skýin eru einskonar einkenni merkisins.  Mikið af fallegum vörum koma frá þessu merki bæði í fatnaði og öðrum nauðsynjavörum fyrir börnin :)  Endilega kíkið á Petit...þið verðið ekki svikin ;) 

Litla Hönnunar Búðin í Hafnarfirði.

Ég gerði mér ferð í Hafnarfjörðinn síðastliðinn þriðjudag og kíkti þar á Strandgötuna. Þar er að finna mikið af skemmtilegum búðum sem gaman er að kíkja í en ein af þessum skemmtilegu búðum er Litla Hönnunar Búðin.  Það er ekki hægt að segja annað en að ég heillaðist strax af þessari búð bara með því að skoða í gluggann. Þegar inn var komið var ég aldeilis ekki svikin en þar var heill hellingur af fallegum hlutum sem gaman var að skoða og láta sig dreyma um. Þar má finna allskonar skemmtilega hönnunarvöru í sambland við listmuni og fallega grafík. Verk eftir búðareiganda og fleiri íslenska listamenn og erlenda hönnuði. Ég fékk að smella af nokkrum myndum til þess að sýna ykkur og ég stóðst ekki mátið og fjárfesti í fallegum pappírs-nashyrning sem ég ætla að setja saman og hengja upp í stofunni minni. 

Ég get ekki annað en sagt að það er alveg þess virði að fá sér rúnt í Hafnarfjörðinn, kíkja í kaffi á Súfistann og taka rölt eftir Strandgötunni, skoða í búðirnar skemmtilegu, láta sig dreyma og jafnvel fjárfesta í einhverju fallegu :) Dásamleg uppskrift af góðum degi :) 

Hjarn.is - Tallow

Mig langar að segja ykkur fá fallegu Hollensku kertunum Tallow sem eru í sölu í netbúðinni Hjarn.is

Ég fjárfesti í einu svona fallegu bláu kerti og fékk kertið nokkrum dögum síðar keyrt upp að dyrum hjá mér þrátt fyrir að búa á Akranesi. Þvílík þjónusta hjá henni Elenu sem rekur búðina. 

Mjög góð og persónuleg þjónusta hjá henni en um leið og ég keypti kertið í gegnum netið fékk ég skilaboð frá henni í e-mail um hvenær hún ætlaði að senda kertið og svo fékk ég persónulega símhringingu þar sem hún tékkaði á því hvort ég væri heima svo hægt væri að koma með þetta heim til mín í dag. Ótrúlega falleg og góð þjónusta sem fær mig til að vilja endilega versla meira á Hjarn.is. 

En þessi fallegu kerti eru bara svo ótrúlega heillandi að ég mæli eindregið með því að þetta verði afmælis/innfluttnings/óvænta gjöfin sem þið mætið næst með til vinar :) 

Barnaherbergi

Þessa dagana eru falleg barnaherbergi ofarlega í huga mínum... enda eitt lítið að fara að bætast við fjölskylduna í ágúst ;) En það þarf nú samt að taka í gegn herbergið hjá elstu dömunni á heimilinu sem fyrst og ég er endalaust að skoða og hugsa þetta. Hún er orðin svolítill unglingur í sér og vill losna við flest allt dótið út úr herberginu enda að verða 10 ára. Hún hrúgar því öllu þessa dagana inn  til litlu systur sinnar...og laumar sér svo þangað inn til að leika sér í dúkkó ;) En pæjuherbergi þarf hún að fá. Það er bara þannig. 

Allt þetta svarta og hvíta heillar voða en mér finnst það oft mjög ópersónulegt og því finnst mér ágætt að hafa hvítan grunnlit á húsgögnunum og poppa svo upp með litum svo að herbergið fá sinn persónulega sjarma. 

Við erum búnar að ákveða þetta nokkurnvegin allt saman í sameiningu og okkur langar báðum að  kanínu-segul-veggfóður eins og sjá má hér neðstu á myndinni fari upp hjá skvísunni. En veggfóðrið fæst í Esja dekor.

Shorebirds eftir Sigurjón Pálsson

Nýlega setti fyritækið Norman Copenhagen í framleiðslu hjá sér nýja vörulínu af fuglum eftir íslenska hönnuðinn Sigurjón Pálsson. Línan nefnist Shorebirds eða strandfuglar á góðri íslensku. 

Línan telur þrjár tegundir af fuglum eða Spóann, Stelkinn og Sendlinginn og hafa þessir fallegu fuglar fengið gott pláss í hillum hönnunarbúða hér á landi. 

Ég var svo sniðug að nýta mér miðnæturopnun sem var nú í byrjun október hér á Akranesi til þess að kaupa mér fugl á afslætti. Fuglarnir eru nýlega lentir í hönnunar- og gjafavöruversluninni @home hér í bæ og ég get sagt ykkur það að þeir eru hver öðrum fallegri og því mjög erfitt að velja ;) 

Að lokum ákvað ég að taka Spóann með bleikum fótum en síðar eignast ég vonandi einn Stelk og einn Sendling :) 

Marmari á Antikmarkaði

Um helgina kíkti ég á hinn margumbloggaða antikmarkað hér á Skaganum. Skemmtilegasta antikmarkað landsins þó víðar væri leitað. Þar fann ég þennan fallega marmaradisk á snúningshjóli...vei!  Og ég keypti hann á heilar 1800 kr. hvorki meira né minna... ! Aðeins ódýrara en í búðinni.... og alveg jafn fallegur ;) Mig hefur lengi langað í einn svona en ekki fundið þann eina rétta...fyrr en núna ;) 

Í sumar ætlar Antikmakaðurinn að vera með bás á matarmarkaði sem haldinn verður allar helgar frá og með 17. júní. og fram að ágústmánuði. Þegar þessir skemmtilegu markaðir byrja verður sko komin góð ástæða til þess að fá sér rúnt á Akranes, kaupa ferska vöru beint frá bónda, eitthvað gott frá Galito að sjálfsögðu (verður með bás líka), og eitthvað fallegt frá Antikbúðinni ;) 

Ég minni á að Akranes er ekki nema um 35 km frá Ártúnshöfða eða svo... ekki langt skal ég segja ykkur ;)

Esja Dekor

Esja Dekor er ný hönnunarvöru-vefverslun sem lumar á ýmsu fallegu ;)  Þar má meðal annars finna fallegu krossviðs-print myndirnar, Faunascape frá vörumerkinu WhatWeDo. Mér finnst þessar krossviðsplötu-dýramyndir ótrúlega fallegar og mig dreymir um að eignast eina mynd. 

En í vefversluninni má finna ýmislegt og örugglega eitthvað fyrir alla. Ég fann mér að allavega eitthvað meira ;) Þar fann ég m.a. dýra vegglímmiða sem ég væri nú alveg til í hafa í fallegu barnaherbergi þegar ég er flutt  - aldrei að vita ;)   

Endilega tékkið á þessari skemmtilegu búð. 

Miðborgarvaka

Á morgun, fimmtudaginn 22. maí verður opnun Listahátíðar í Reykjavík. Af því tilefni verða verslanir í miðbænum opnar lengur eða til kl. 22. 

Í Kirsuberjatréð Íslensk Hönnun verður mikið um að vera. Í herberginu verður POP UP markaður þar sem listamennirnir og fjörkálfarnir Fiona Cribben , Erla Gísladóttir og Mjólkurbúið selja fallegar vörur. Þar að auki verða Kirsuberjakonur með útimarkað fyrir utan búðina þar sem kennir ýmissa grasa og tilboða en þær verða líka með léttar veitingar fyrir gesti og gangandi. 

Ég geri ráð fyrir að stemmningin í miðbænum verði listræn og mögnuð á morgun og það er því alveg tilvalið að kíkja í miðbæ Reykjavíkur annað kvöld og skoða fallegar vörur og hitta fallegt fólk ;) 

Barstóla pælingar.

Jæææææææjjjja.... nú hef ég LOKSINS endurheimt líf mitt aftur eftir skil á masters ritgerð :) Jeijjj!!!
Ég hef ekki litið uppúr ritgerðarskrifum síðan um miðjan mars mánuð sem er skýringin á því að bloggið hefur legið svona nokkurnvegin í dvala. Enda ætla ég mér að útskrifast úr þessum skóla þessa önnina. :)  Nú á ég bara eftir að skila tveimur einingum í hús og þá er ég komin með allar þær einingar sem ég þarf til að útskrifast...og þessar tvær sem eftir eru eru nú bara pís of keik miðað við ritgerðarbrjálæðið sem nú er loks yfirstaðið. Skrítið samt hvað maður er eitthvað tómur í hjartanu eftir að hafa skilað þessari ritgerð.... í gær upplifði ég meiriháttar samviskubit yfir því að hafa skilað og sú hugsun réðst hart á mig að ég hefði gleymt einhverju... mjög óþæginlegt. Svona er maður skrítin...

En...að örðu... Núna má ég loksins hugsa um þá hluti sem ég hef ekki leyft mér að hugsa um síðustu mánuði. Ég er að fara að eignast nýtt eldhús... reyndar nýtt hús veijj!! ... en já...nýtt eldhús með eyju ;) Svolítið draumaeldhús. Við eldhúseyjuna þarf að setja sirka 3 barstóla og að velja fallega og sniðuga barstóla getur verið ansi flókið skal ég segja ykkur. Ég þekki ansi marga sem eiga barstóla og hef því ákveðnar skoðanir hvað ég vil og hvað ég vil ekki hafa á mínum stólum.
Ég vil ekki hafa stóra plötu undir stólfætinum, uppá þrif er betra að hafa fjórar fætur.
Ég vil helst hafa snúnings sessu (þó að það sé nánast ekki raunhæft ef maður ætlar að hafa fjórar fætur).
Ég vil hafa bólstraða sessu.
Mig langar helst að hafa einhvern við - eik eða hnotu-  í stólnum.

Já... þetta er flókið... og það leit allt út fyrir að þessi stóll væri ekki til...þangað til í gær. Þegar ég fór að leita og leita á netinu, þá fann ég stóla eftir hönnuðinn Daníel Magnússon.
Daníel er listamaður en hefur líka verið að hanna stóla fleira skemmtilegt. Stólana hans má m.a. finna á barnum á 101 Hótel.

En það eru nokkrir stólar sem ég hef fundið nú þegar hér á landi sem koma til greina.... mis dýrir en allir fallegir. Nú væri gott ef maður gæti skit... peningum. ;)

Stóllinn eftir Daníel Magnússon. 

Barstóll frá GÁ húsgögnum. 

Ilva

Casa

Modern

Húsgagnahöllin

Modern

Hlín Reykdal og styrktarfélagið Göngum saman.

Á morgun, 10. apríl verður hamingjustund í versluninni KIOSK á Laugavegi 65 en þá mun hefjast sala á þessum fallegu lyklakippum sem sjá má hér á myndum fyrir neðan. Lyklakippurnar eru eins og sjá má, eftir Hlín Reykdal fata- og skartgripahönnuð en kippurnar eru hannaðar fyrir styrktarfélagið Göngum saman og rennur ágóðinn af sölunni til styktafélagsins. 

Styrktarfélagið Göngum saman hefur það að markmiði að styrkja grunnrannsóknir á brjóstakrabbameini. Göngum saman leggur áherslu á mikilvægi hreyfingar bæði til heilsueflingar og til að afla fjár í styrktarsjóð félagsins sem styrkir grunnrannsóknir á krabbameini í brjóstum.

Hlín þarf vart að kynna en hún er þekkt fyrir hönnun ýmiskonar fylgihluta svo sem hálsmena og armbanda. Hún útskrifaðist frá Listaháskóla Íslands 2009, með B.A. gráðu í fatahönnun og er einn af eigendum og stofnendum verslunarinnar KIOSK sem er á Laugavegi 65.

Frá kl. 17:00 - 19:00 verða kippurnar frumsýndar í KIOSK á morgun og þeir sem vilja eignast eina slíka ættu að renna við í búðinni hjá Hlín og fjárfesta í einni. Kippurnar eru til í takmörkuðu upplagi og verða seldar nú í apríl eða á meðan birgðir endast. Kippan kostar 3.500 kr.  sem er nú ekki mikið þegar maður styrkir gott málefni :) 

Hrím Eldhús opnar

Ég kíkti á opnun nýju Hrím búðarinnar í dag - Hrím Eldhús. Tinna sem rekur Hrím búðirnar hefur staðið í ströngu síðustu daga við að koma öllu saman (og reka á eftir iðnaðarmönnunum), en búðin er rosalega vel heppnuð. Tinna sá sjálf um að teikna allt upp og hanna útlit búðarinnar sem er mjög falleg og nýstárleg. Þarna mátti sjá krossvið í bland við fallegar hvítar hillur og auðvitað var þarna að finna appelsínugula litinn sem einkennir Hrím.  Það sem er voða skemmtilegt við þessa búð er að þarna geta mömmur komið að skoðað og börnin geta leikið á meðan í fallegu barnahorni. Ég gleymdi reyndar að taka mynd af þessu sniðuga barnahorni, en þið mömmurnar verðið bara að drífa ykkur í Hrím Eldhús til þess að skoða þetta allt saman :) 

Tinna hefur augljóslega vandað valið á vörunum sem eru til sölu í Hrím Eldhús, en þarna eru nokkur ný vörumerki sem ekki hafa verið í boði áður á Íslandi. Jeijjjjj!!! :) 

Hjartanlegar hamingjuóskir með nýju búðina ykkar Tinna, að opna búð á alþjóðlegum degi hamingjunnar hlýtur að vera gæfumerki. :) 

Félagarnir frá Omnom gáfu smakk af undursamlega góðu súkkulaði. Auðvitað stóðst ég ekki mátið og smakkaði allt sem í boði var :) Hvíta súkkulaðið var uppáhalds :) 

Í búðinni er búið að setja upp eldhús í einu horninu til þess að sýna vörurnar í sínu rétta umhverfi en þarna má sjá hana Örnu skoða eldhúsið fallega. 

Fallegar og girnilegar vörur. 

Rauðhetta flóamarkaður :)

Á facebook er að finna skemmtilegan flóamarkað undir nafninu Rauðhetta.  Flóamarkaðnum er haldið úti af henni Svandísi en hún er mjög sanngjörn í verði. 

Ég er orðin forfallinn flóamarkaðs-fíkill - ég játa það fúslega - en það er bara svo oft margt fallegt að finna á þessum mörkuðum. Það hefur einkennt marga flóamarkaði hérlendis að vörurnar séu svolítið dýrar en bæði Svandís í Rauðhettu og skemmtilegi bílskúrs-flóamarkaðurinn hér á Skaganum eru með sanngjörn verð á góðum vörum. 

Ég fór um helgina og náði í nokkrar vörur sem ég hafði keypt hjá henni í gegnum facebook en ég keypti þessa fallegu salt og pipar marmara stauka hjá henni og marmarakertastjakann. Svo fékk ég fat og bolla í stellið mitt... húrra fyrir því! 

Endilega tékkið á Rauðhettu :) 

Mjólkurbúið

Mjólkurbúið er ný og skemmtileg barnavöru- og lífsstílsbúð. Búðin er eins og er eingöngu á netinu en í netversluninni er margt fallegt og skemmtilegt að sjá. 

Á facebook síðu búðarinnar segir að Mjólkurbúið sé lífstílsverslun fyrir vandláta foreldra, en þar má finna mikið af fallegum og vönduðum vörum. Meðal annars þennan forkunnafagra lampa sem má sjá hér fyrir ofan. Lampinn nefnist Miffy og er hannaður af hollenska hönnunarteyminu Mr. Maria. Þessi lampi er gjörsamlega að gera allt vitlaust í barnaherbergja-hönnun þessa dagana og er að birtast allstaðar í bæði tímaritum og bloggum sem fjalla um hönnun. 

Hér fyrir neðan má sjá þær fallegu vörur sem ég heillaðist að... en ég gat ekki valið hvaða poster mér fannst fallegastur...svo ég sleppti bara að birta mynd af því. Þið skoðið það bara sjálf með því að klikka á link búðarinnar :) 

Ginkgo á Stockholm Furniture Fair

Fyrirtækið Blå Stationet kynnti til leiks nýja vöru í vörulínu sinni á Stockholm Furniture Fair. Um er að ræða vöruna Ginkgo sem er fallegt veggskraut sem er líka hljóðdeifir. Ginkgo dregur úr hávaða í rýmum en er í leiðinni fallegt listaverk sem getur stækkað og minnkað eftir henntileika. 

Munstrið minnir á hreistur á fiski en um leið getur það líka minnt á náttúruna eða önnur skemmtileg dýr. - Gefur skemmtilega stemmningu í rými.