Litla Hönnunar Búðin í Hafnarfirði.

Ég gerði mér ferð í Hafnarfjörðinn síðastliðinn þriðjudag og kíkti þar á Strandgötuna. Þar er að finna mikið af skemmtilegum búðum sem gaman er að kíkja í en ein af þessum skemmtilegu búðum er Litla Hönnunar Búðin.  Það er ekki hægt að segja annað en að ég heillaðist strax af þessari búð bara með því að skoða í gluggann. Þegar inn var komið var ég aldeilis ekki svikin en þar var heill hellingur af fallegum hlutum sem gaman var að skoða og láta sig dreyma um. Þar má finna allskonar skemmtilega hönnunarvöru í sambland við listmuni og fallega grafík. Verk eftir búðareiganda og fleiri íslenska listamenn og erlenda hönnuði. Ég fékk að smella af nokkrum myndum til þess að sýna ykkur og ég stóðst ekki mátið og fjárfesti í fallegum pappírs-nashyrning sem ég ætla að setja saman og hengja upp í stofunni minni. 

Ég get ekki annað en sagt að það er alveg þess virði að fá sér rúnt í Hafnarfjörðinn, kíkja í kaffi á Súfistann og taka rölt eftir Strandgötunni, skoða í búðirnar skemmtilegu, láta sig dreyma og jafnvel fjárfesta í einhverju fallegu :) Dásamleg uppskrift af góðum degi :) 

Miðborgarvaka

Á morgun, fimmtudaginn 22. maí verður opnun Listahátíðar í Reykjavík. Af því tilefni verða verslanir í miðbænum opnar lengur eða til kl. 22. 

Í Kirsuberjatréð Íslensk Hönnun verður mikið um að vera. Í herberginu verður POP UP markaður þar sem listamennirnir og fjörkálfarnir Fiona Cribben , Erla Gísladóttir og Mjólkurbúið selja fallegar vörur. Þar að auki verða Kirsuberjakonur með útimarkað fyrir utan búðina þar sem kennir ýmissa grasa og tilboða en þær verða líka með léttar veitingar fyrir gesti og gangandi. 

Ég geri ráð fyrir að stemmningin í miðbænum verði listræn og mögnuð á morgun og það er því alveg tilvalið að kíkja í miðbæ Reykjavíkur annað kvöld og skoða fallegar vörur og hitta fallegt fólk ;) 

Útskriftarsýning LHÍ

Um síðastliðna helgi skelti ég mér á útskriftasýningu LHÍ í Listasafni Reykjavíkur. Sýningunni lauk síðastliðin sunnudag þannig að ég rétt náði í skottið á henni og hef ekki haft neinn tíma í tölvu fyrr en núna. EN... Sýningin var frábær eins og alltaf og hér fyrir neðan má sjá nokkrar myndir af verkum nemendanna. 

Að mínu mati var vöruhönnunin með bestu og áhugaverðustu sýninguna í ár en nemendurnir skelltu sér öll í búning vísindamannsins og unnu öll þróunarvinnu af ýmsum toga en ég ætla bara að skrifa sérstaklega um þeirra verk við þeirra myndir. Ég tók þó ekki myndir af öllum verkunum þeirra. 

Katrín Magnúsdóttir og Línuvinnslu Reykjavíkur. Línuvinnsla Reykjavíkur byggir á fornri reipagerð, handverki sem horfið er úr íslensku umhverfi, unnið út frá aðferðum netagerðarmannsins. 

Línan er unnin úr ódýrum plastpokum sem er umbreytt í veiðilínu með þekktum handverksaðferðum. 

Með þessu er verðmætagildi plastpokanna aukin en verkefnið sýrnir það ferli þar sem leitast er eftir að endurvinna á umhverfisvænan hátt spilliefni sem dagar uppi í náttúrunni og skaðar lífríkið. 

Thelma Hrund Benediktsdóttir og verkið Gull í greipar sjávar. Thelma vann með saltverksmiðjunni á Reykhólum en þar uppgötvaði hún afgangs saltefni sem ekki er notað í vinnslu hjá þeim. Úr afgangs saltinu vann hún umhverfisvæna sápu með endurnýtingu á hráefnum að leiðarljósi. Magnesíumríkt saltið sem ekki er nýtt í matvælaframleiðslu er blandað við þörungaduft svo úr verður umbreytt og verðmæt vara. Í framleiðsluna er notað heitt þrínýtt vatn sem notað hefur verið hjá verksmiðjunni við þörungavinnslu og saltvinnslu og að lokum við sápugerðina. Í þessu verkefni nær Thelma að sameina krafta fyrirtækjana á Reykhólum. 

Sigurjón Axelsson og Fungi. 

Verkið er innblásið af náttúrulegri hringrás sveppa. Ræktaðar eru svepparætur og sköpuð framleiðsluaðferð. Með því móti er myndaður efnismassi út frá svepparótinni og er hann nýttur sem efniviður. Hér er svepparótamassinn látinn vinna inn í ákveðnu móti þar sem hann stækkar og dreyfir sér á nokkrum dögum. Eftir nokkra daga hefur myndast skál sem þarf síðan að þurrka upp áður en hún er nýtt sem umbúðir undir ostrusveppinn. 

Björk Gunnbjörnsdóttir og BDFU 1:3. 

Á myndinni hér fyrir neðan má sjá hvernig nýta má tré sem klippt eru niður og falla til við grisjun garða og skóga. Úr trjánum er unnið sag eða salli en með því að blanda saginu við lífrænt plast úr náttúrulegum hráefnum verður úr algjörlega nýr efniviður sem nýta má í smíðavinnu þar sem reiknað er með að efnivðurinn eigi að bortna niður. Efniviðurinn er léttur og sterkur en samtsem áður lífrænn og er því fljótur að brotna niður í náttúrunni. 

Nýja bókin í hillunni :)

Mig hefur alltaf dreymt um að eignast verk eftir Stórval (ef einhver á og vill selja mér þá má sá hinn sami senda mér skiló).  Um daginn var mér bent á þessa skemmtilegu bók eftir Roni Horn, ameríska listakonu og rithöfund. Bókin inniheldur myndir af verkum eftir Stórval inni á heimilum fólks...þannig að það er bæði gaman að skoða verkin...og heimilin.. tvær flugur í einu höggi ;)

Stórval hét fullu nafni Stefán V. Jónsson og hann var fæddur árið 1908 á Möðrudal á fjöllum. Þar bjó Stórval þar til árið 1948 en þá ákvað hann að flytjast til Reykjavíkur. Stórval málaði nær einungis Herðubreið en fjallið er staðsett suðvestur af Möðrudal. Öðruhvoru málaði Stórval rollur, hesta eða önnur dýr á myndir sínar og þá fór það eftir fjölda dýranna á myndinni hvað hann verðlagði myndina á.  - segir sig sjálft. :) 

 Stórval var alþýðulistamaður sem seldi oft myndirnar sínar á bekk í miðbæ Reykjavíkur. Hann seldi aldrei myndirnar sínar dýrt þannig að margir eignuðust myndir eftir hann á árum áður. Nú til dag eru myndirnar hans hins vegar að seljast örlítið dýrar, enda líklega margir sem vilja eiga eina fallega mynd eftir hann. 

...einn daginn eignast ég eina ;) 

Hér má sjá snillinginn Stefán V. Jónsson frá Möðrudal halda á einum pott af Mysu. 

Tenging Norður - sýning í Norræna húsinu.

Tenging Norður er sýning sem nú er í gangi í Norræna Húsinu. Sýningin er haldin í tengslum við ráðstefnu sem haldin var í Norræna húsinu dagana 7-9. nóvember og stendur sýningin frá 8. - 24. nóvember. Á sýningunni eru sýnd verk eftir listamenn frá norðurslóðum en m.a. má nefna að þarna eru verk eftir listamenn frá Íslandi, Alaska, Bandaríkjunum, Kanada, Noregi, Svíþjóð, Finnlandi og Rússlandi. Á sýningunni má sjá upptöku af Eldskúlptúr gjörninginum sem ég ásamt samnemum mínum  úr LHÍ stóðum að síðastliðinn föstudag ásamt fullt af færu fólki úr FG og Borgarholltsskóla ásamt stúlkum úr Barnaskóla Hjallastefnunnar. En þar má líka finna fullt af fallegum verkum eftir flotta listamenn. 

Myndirnar tala sínu máli. 

Ég mæli með að þið kíkið á þessa sýningu. 

UJÓNSDÓTTIR

Unnur Jónsdóttir er ung og upprennandi listakona á Akranesi. Unnur er menntaður grafískur hönnuður frá Myndlistaskóla Akureyrar og hefur unnið sem slíkur síðustu árin.  

Unnur sem hefur alltaf verið mikill teiknari hefur nú tekið upp fyrrum ástarsamband við blaðið og "blýantinn" og er farin að teikna þessar fallegu hauskúpur. Og ykkur til mikillar gleði þá get ég sagt ykkur að hún er að selja myndirnar sínar á facebook síðu sinni. Og aldeilis á mjög billegu verði ;) 

" Ég hef alltaf verið mikill teiknari og teiknaði mjög mikið sem barn. 

Þó hefur það verið þannig síðustu ár að ég hef fremur verið föst fyrir framan 

tölvunna heldur en að vera teikna. 

Svo þetta hefur verið góð tilbreyting, að setjast við eldhúsborðið eða bara hvar

sem er með blað og penna og bara teikna, tala nú ekki um þegar maður er 

með smá nammi í skál og góða tóna á fóninum, þannig verða kúpurnar bestar" 

- segir Unnur kampakát. 

Að sjálfsögðu er ég búin að fjárfesta í einni mynd sem nú bíður eftir að fara upp á vegg heima . 

Fallegt!

Yellena James

Ég var í einni af skoðunarferðum mínum um Etsy þegar ég rakst á þetta.
Yellena James er bandarísk myndlistakona. Ég er alveg heilluð af grafíkinni hennar og væri meira en til í að fegra veggi heimilsins með verkunum hennar. Hér er smá sýnishorn úr etsy búðinni hennar.

Þetta eru svo undarlega töfrandi myndir. Minna mig á blóm, kóral og annan neðansjávargróður en á sama tíma líka eitthvað úr öðrum heimi.

Það er alveg hægt að segja að hún sé búin að "meika" það. Hún hefur hannað snjóbretti fyrir K2, tölvumús fyrir Microsoft, snyrtivörulínu fyrir Crabtree & Evelyn, klút fyrir Anthropologie svo eitthvað sé nefnt. Meira er hægt að sjá hér.

Listakonan Aðalheiður S. Eysteinsdóttir

Aðalheiður Eysteinsdóttir er ein af mínum uppáhalds listakonum/listamönnum.  Af verkum hennar og myndum að dæma þá er hún greinilega algjör kjarna kona. 

Aðalheiður vinnur aðallega í við og smíðar saman verk sín á skemmtilegan, líflegan hátt. Vinnustofa og heimili Aðalheiðar er staðsett í Freyjulundi í Arnarneshreppinum rétt við Akureyri og mig dreymir um að heimsækja hana þangað og fá aðeins að skoða vinnustofuna og kannski kaupa mér fallegt verk eftir hana. Það er eiginlega ótrúlegt hvað hún nær líkamsstellingum manna og dýra vel. 

MoMA - New York

Það síðasta sem við gerðum í New York, áður en við fórum út á flugvöll, var að við fórum á Museum of Modern Art.

Það voru fullt af fallegum verkum að sjá eftir marga meistara. 

Safnið sjálft er líka algjört meistaraverk í arkitektúr. 

ótrúlega fallegt allt saman. 

Ég hendi hérna inn nokkrum myndum af safninu. Sum verkin fá nöfn höfunda við þau, en ég tók ekki niður höfunda hjá neinum...þannig að meirihlutann man ég ekki hvað heitir. 

En þetta er svo mikið augnayndi að það er það sem skiptir mestu :) 

Er það ekki...?

Smá vöruhönnun hér fyrir neðan... við þekkjum þetta mest allt...er það ekki?

Skemmtilegur leikur með form og skugga :) 

Tom Wesselman á þessar fallegu varir hér fyrir neðan...eða málaði þær :) 

Hér fyrir ofan er spegill sem búið er að mála á mann í raunstærð... afskaplega skemmtilegt verk, því það leit út fyrir að þarna væri op inn í annað rými. :) 

Byggingin sem að safnið er í er ótrúlega falleg og hvert einasta rými er listaverk útaf fyrir sig. Ég hefði viljað drita myndum af rýmunum á myndavélina mína, en fannst það pínu óvirðing við verkin á safninu :) haha :) 

Fyrir ofan má sjá verk eftir Vincent Van Gogh

og fyrir neðan er það Picasso sjálfur :) En verkin eftir Picasso heita "Three Musicians" og "Girl before a mirror"

 Hér fyrir neðan er mynd eftir Monet sem kallast "Water Lillies"

Þetta fannst mér bara ótrúlega fyndinn og fallegur skinn-bolli :)