DIY: Heimagerðir kertakrukkustjakar

Í síðustu viku fór ég að dunda mér með póstulínspenna á meðan ég beið eftir að kvöldmaturinn eldaðist. Ég ákvað að prufa að teikna á eina af þessum fjölmörgu krukkum sem hafa safnast saman heima hjá mér og gerði lítið þorp með jólastjörnu og snjókomu. Stelpurnar mínar fengu að sjálfsögðu líka að teikna sín listaverk en þær eru 9 og 4 ára. Við mæðgur sátum því saman í kósý stemmningu og gerðum jóla-kertastjaka. Listaverkin sem dætur mínar gerður voru að sjálfsögðu æðisleg og útkoman var þessir líka afskaplega fallegu og jólalegu kertastjakar. 

Eldri stelpan mín fór að sjálfsögðu að framleiða kertastjakana í nokkru mæli og ákvað að þetta yrði jólagjöfin frá henni í ár handa öllum sem hana langaði að gefa jólagjafir. 

Það sem þarf í þetta er ekki kostnaðarsamt en póstulínspennin fæst í föndru og kostar 995 krónur og svo eru það bara fallegu krukkurnar. Ég sýni ykkur þetta svona hrátt og eins og það lítur út eftir að teikningin hefur verið gerð, en auðvitað má setja á krukkuna borða eða falleg bönd, jólagrein eða köngul og gera þannig krukkurnar hátíðlegri (sem verður næst á dagskrá hjá okkur).

Hér fyrir neðan má sjá krukkurnar komnar á sína staði á heimilinu með kertaljósi og kósýheitum. 

Hvað er náttúrulegra heimili?

Nú ætla ég að reyna að koma eftirfarandi frá mér, án þess að það hljómi eins og fiðrildaprump og grænar hljóðbylgjur.

Fyrir skömmu var stofnaður hópur á Facebook, Náttúrulegra heimili.
Nafnið segir sig sjálft en þetta er eitthvað sem ég fór ekki að spá í af neinni alvöru fyrr en ég eignaðist barn. Vilja ekki allir það besta fyrir börnin sín? -Það besta er ekki það dýrasta.
Það er til aragrúi af álíka hópum en ég hef ekki fundið neinn á íslensku, fyrir íslenskar aðstæður.
Það er alltaf gaman að vera í félagsskap fólks sem spáir í svipuðum hlutum og þú. Það er enn skemmtilegra að vera í hópi sem hefur hvetjandi áhrif á þig.
Þrátt fyrir að hópurinn sé nýr ennþá þá hefur margt skemmtilegt og fræðandi verið rætt um. Þú þarft ekki að vera græn/n í gegn til að vera með.

Maíspokarnir sem eru nú loksins að birtast sem valmöguleiki í stað plast innkaupapoka við kassa í mörgum af stóru matvöruverslununum hafa verið ræddir.

Meðlimir hafa líka deilt uppskriftum af uppáhalds DIY hreinlætisvörunum sínum og það á eflaust margt eftir að bætast við. Ég er mjög spennt að prófa uppskrift af þessum líkamsskrúbbi:

Að "vera grænni" snýst ekki bara um að þvo ruslið og stafla því saman í eldhúsinu.
Það er hægt að gera svo miklu meira OG þú gætir bætt heilsuna og sparað í leiðinni. Því fylgir líka góð tilfinning, að finnast þú vera að gera eitthvað örlítið betur. Fyrir utan það að kenna börnunum betri siði.

- Borða betri mat og minnka aukaefnin sem heimilisfólkið þitt innbyrðir

• Að gefa sér aðeins meiri tíma í að útbúa matinn frá grunni.

- Nota hreinni hreinsivörur fyrir heimilið og líkamann

• Geturðu borið fram öll efnin sem snerta húðina á hverjum degi?

• Finnst þér það í lagi?

- Nota þína eigin orku meira til að komast á milli staða þegar þú getur, í stað bílsins.

• Hitaeiningar í stað mengunar

- Kaupa notaða hluti og gera að þínum eigin

Þú þarft ekki að gera allt í einu. Margt smátt gerir eitt stórt og allt það.
Það er alltaf gott að muna að góður göngutúr byrjar á einu skrefi.

Marmari á Antikmarkaði

Um helgina kíkti ég á hinn margumbloggaða antikmarkað hér á Skaganum. Skemmtilegasta antikmarkað landsins þó víðar væri leitað. Þar fann ég þennan fallega marmaradisk á snúningshjóli...vei!  Og ég keypti hann á heilar 1800 kr. hvorki meira né minna... ! Aðeins ódýrara en í búðinni.... og alveg jafn fallegur ;) Mig hefur lengi langað í einn svona en ekki fundið þann eina rétta...fyrr en núna ;) 

Í sumar ætlar Antikmakaðurinn að vera með bás á matarmarkaði sem haldinn verður allar helgar frá og með 17. júní. og fram að ágústmánuði. Þegar þessir skemmtilegu markaðir byrja verður sko komin góð ástæða til þess að fá sér rúnt á Akranes, kaupa ferska vöru beint frá bónda, eitthvað gott frá Galito að sjálfsögðu (verður með bás líka), og eitthvað fallegt frá Antikbúðinni ;) 

Ég minni á að Akranes er ekki nema um 35 km frá Ártúnshöfða eða svo... ekki langt skal ég segja ykkur ;)

Útskriftarsýning LHÍ

Um síðastliðna helgi skelti ég mér á útskriftasýningu LHÍ í Listasafni Reykjavíkur. Sýningunni lauk síðastliðin sunnudag þannig að ég rétt náði í skottið á henni og hef ekki haft neinn tíma í tölvu fyrr en núna. EN... Sýningin var frábær eins og alltaf og hér fyrir neðan má sjá nokkrar myndir af verkum nemendanna. 

Að mínu mati var vöruhönnunin með bestu og áhugaverðustu sýninguna í ár en nemendurnir skelltu sér öll í búning vísindamannsins og unnu öll þróunarvinnu af ýmsum toga en ég ætla bara að skrifa sérstaklega um þeirra verk við þeirra myndir. Ég tók þó ekki myndir af öllum verkunum þeirra. 

Katrín Magnúsdóttir og Línuvinnslu Reykjavíkur. Línuvinnsla Reykjavíkur byggir á fornri reipagerð, handverki sem horfið er úr íslensku umhverfi, unnið út frá aðferðum netagerðarmannsins. 

Línan er unnin úr ódýrum plastpokum sem er umbreytt í veiðilínu með þekktum handverksaðferðum. 

Með þessu er verðmætagildi plastpokanna aukin en verkefnið sýrnir það ferli þar sem leitast er eftir að endurvinna á umhverfisvænan hátt spilliefni sem dagar uppi í náttúrunni og skaðar lífríkið. 

Thelma Hrund Benediktsdóttir og verkið Gull í greipar sjávar. Thelma vann með saltverksmiðjunni á Reykhólum en þar uppgötvaði hún afgangs saltefni sem ekki er notað í vinnslu hjá þeim. Úr afgangs saltinu vann hún umhverfisvæna sápu með endurnýtingu á hráefnum að leiðarljósi. Magnesíumríkt saltið sem ekki er nýtt í matvælaframleiðslu er blandað við þörungaduft svo úr verður umbreytt og verðmæt vara. Í framleiðsluna er notað heitt þrínýtt vatn sem notað hefur verið hjá verksmiðjunni við þörungavinnslu og saltvinnslu og að lokum við sápugerðina. Í þessu verkefni nær Thelma að sameina krafta fyrirtækjana á Reykhólum. 

Sigurjón Axelsson og Fungi. 

Verkið er innblásið af náttúrulegri hringrás sveppa. Ræktaðar eru svepparætur og sköpuð framleiðsluaðferð. Með því móti er myndaður efnismassi út frá svepparótinni og er hann nýttur sem efniviður. Hér er svepparótamassinn látinn vinna inn í ákveðnu móti þar sem hann stækkar og dreyfir sér á nokkrum dögum. Eftir nokkra daga hefur myndast skál sem þarf síðan að þurrka upp áður en hún er nýtt sem umbúðir undir ostrusveppinn. 

Björk Gunnbjörnsdóttir og BDFU 1:3. 

Á myndinni hér fyrir neðan má sjá hvernig nýta má tré sem klippt eru niður og falla til við grisjun garða og skóga. Úr trjánum er unnið sag eða salli en með því að blanda saginu við lífrænt plast úr náttúrulegum hráefnum verður úr algjörlega nýr efniviður sem nýta má í smíðavinnu þar sem reiknað er með að efnivðurinn eigi að bortna niður. Efniviðurinn er léttur og sterkur en samtsem áður lífrænn og er því fljótur að brotna niður í náttúrunni. 

Antik á Akranesi

Á laugardaginn kíkti ég eins og svo oft áður á antik-markað hér á Akranesi sem staðsettur er í bílskúr einum á Heiðarbrautinni. Ég er ein af fastagestunum sem mætir alltaf þegar það er opið og ég fer aldrei tómhent heim. Þessa helgina hafði ég hug á að kaupa nokkra hluti sem ég síðan fann ekki...einhver var á undan mér líklega. En það er stundum þannig. En í staðin keypti ég könnu í stellið mitt og þennan fallega marmara kertastjaka. Ég keypti líka litla hillu með hönkum á inn í barnaherbergið sem þið fáið að sjá þegar búði er að hengja hana upp og gera fínt ;) 

Ég hef áður sagt ykkur frá þessum skemmtilega markaði hér í þessari færslu. Og nú um helgina varð algjör sprengja í aðsókn hjá þeim hjónum Kristbjörgu og Björgvini sem reka antík-markaðinn. Það gjörsamlega fylltist hjá þeim bílskúrinn af fólki. Þarna voru líka fréttamenn að taka viðtal við hjónin, en Björgvin á ótrúlegt safn af gömlum vélmennum....og svo fjallaði Dr. Gunni um ferð sína þangað með fréttafólkinu á blogginu sínu. Ég hef oftast verið þarna að gramsa ein eða með 2-3 öðrum, en á laugardag varð bílskúrinn eins og sardínudós. Sem er auðvitað bara af hinu góða.

En það sem er svo sérstakt við þennan antík-flóamarkað er að þarna er hægt að nálgast verðmæti á góðu verði. Þið einfaldlega verðið að kíkja þarna þegar opið er. 

Oftast er opið 1. helgi hvers mánaðar.  

Vörubretti.

Það má nýta vörubretti á ýmsan hátt. Hér má sjá 2 skemmtilegar hugmyndir um það hvernig má nota þennan ódýra efnivið til þess að búa til eitthvað mjög smart heimavið...eða í bústaðinum.

Vörubretti má fá útum allt hér á landi. Hjá öllum helstu framleiðslufyrirtækjum og fluttningafyrirtækjum. - mig langar mest að búa til sófa á pallinn með vörubrettum.

 Hver veit? Kannski verður eitthvað svoleiðis komið á pallinn næsta sumar :) 

Íslenskar taubleyjur

Mér hefur fundist ákveðin vakning í náttúruverndarmálum síðustu ár. Fólk er farið að enduvinna meira og vera almennt grænni í hugsun og gjörðum.

Þetta þykir mér ákaflega skemmtilegt og gott að hugsa um.

Taubleyjur eru náttúrvænni kostur en einnota bleyjur.
Þær eru líka fallegar, þægilegar&mjúkar og þú þarft ekki að fara út með ruslapokann 1-2 á dag, það er ekki bleyjufnikur í ruslinu, auk þess sem þær eru mun ódýrari kostur.
Hugsanlegir ókostir, þú þarft að þvo þær, þér gæti þótt það ruglingslegt að kynna þér úrvalið, það eru miklar líkur eru á því að þú farir að spá mikið í þeim.

Það hefur orðið mikil gróska í úrvali á Íslenskum heimasaumuðum bleyjum. Það er frábært! Án þess að þetta verði einhver predikun eða kaffæring þá langar mig að sýna ykkur örlítið af því sem er í boði hjá íslensku saumakonunum.
Sjálf hef ég sest við saumavélina og sauma bleyjur undir nafninu Regnbogarass.

Hér er ein frá mér 

 

 BOSSA 

JóGu

 BHB Baby Design

 Káti fíllinn

MiniMammút

Montrassar

Rassálfar

Stjörnukríli

Svartir Svanir

Athugið þó að þetta er einungis sýnishorn af því sem við allar erum að sauma.

Svo má ekki gleyma að nefna tvær búðir, sem þú getur gengið inn í, þreifað á og keypt taubleyjur. Það er ekki algengt, hvergi í heiminum. Þar er líka hægt að fá leiðbeiningar og aðstoð fyrir byrjendur.

Taubleyju úrvalið í Snilldarbörnum í Skeifunni

Sýnishorn af bleyjuúrvali í Þumalínu í Hátúni

Ég er annars farin að hengja upp skemmtilegasta þvottinn, vélin var að klárast -bleyjurnar hreinar og fínar.

Umhverfisvæn innstunga

Í dag verður umhverfisvæn umfjöllun í tilefni 1. maí - verkalýðsdagsins og grænu göngunnar sem haldin var í dag. 

Yanko design er hönnunarfyrirtæki sem hefur hannað sólarrafhlöðu innstunguna. 

Innstungan virkar þannig að hún er með sogskál og festist þannig við gluggann. Undir sogskálinni er sólarrafhlaða sem býr til rafmagn sem fer strax þangað sem það nýtist. Hingað til hafa sólarrafhlöður eingöngu safnað rafmagni sem notast síðar en í þessari innstungu nýtist rafmagnið strax. 

Sniðug og skemmtileg hugmynd og mig langar agalega að eiga 2-3 svona. - kannski að maður kaupi svona þegar þetta kemur á markað :) 

Listakonan Aðalheiður S. Eysteinsdóttir

Aðalheiður Eysteinsdóttir er ein af mínum uppáhalds listakonum/listamönnum.  Af verkum hennar og myndum að dæma þá er hún greinilega algjör kjarna kona. 

Aðalheiður vinnur aðallega í við og smíðar saman verk sín á skemmtilegan, líflegan hátt. Vinnustofa og heimili Aðalheiðar er staðsett í Freyjulundi í Arnarneshreppinum rétt við Akureyri og mig dreymir um að heimsækja hana þangað og fá aðeins að skoða vinnustofuna og kannski kaupa mér fallegt verk eftir hana. Það er eiginlega ótrúlegt hvað hún nær líkamsstellingum manna og dýra vel. 

Vetrarhátíð Reykjavíkurborgar

Í dag byrjar Vetrarhátíð Reykjavíkurborgar. Ég og samnemendur mínur í Listkennsludeild LHÍ ætlum að vera með upplifunar-event í Grasagarðinum í tilefni þess. En auk okkar uppákoma verður finnski umhverfislistamaðurinn Timo Jokela að sýna ísskúlptúra. Timo Jokela kemur sérstaklega frá Finnlandi fyrir vertrarhátíðina og vinnur hann þessa stundina að listaverkum í Grasagarðinum sem hann gerir úr snjó. Búið er að flytja snjó í Grasagarðinn og eru nemendur listkennsludeildar að vinna með honum að því að móta verk úr snjónum. 

Hér fyrir neðan sjáið þið verk úr fyrri sýningum listamannsins og á neðstu myndinni má sjá nemendur LHÍ vera að vinna að snjóverkunum með honum. 

Það er alveg tilvalið að kíkja með alla fjölskylduna í Grasagarðinn á morgun, föstudaginn 8. febrúar til þess að líta verk hans augum og upplifa Magnað myrkur með okkur :) Í boði verður ljósaganga, umhverfishlustun, heit laug fyrir kaldar tær og speglaganga. :) 

Verið Hjartanlega Velkomin.

Endurunninn pappír

Nína dóttir mín hefur nokkrum sinnum komið heim með endurunninn pappír úr leikskólanum. Nú er hún komin í 2. bekk og þau öll börnin gerðu endurunninn pappír  fyrir Malaví söfnun sem skólinn stendur fyrir á hverju ári fyrir jólin. Þau seldu pappírinn sem þau bjuggu til ásamt öðru skemmtilegu föndri sem þau gerðu. En allur skólinn tekur þátt í að undirbúa jólasölu þar sem seldar eru smákökur sem þau baka sjálf, fallegt jólaskraut og annað sniðugt sem þau hafa búið til. Allur ágóði fer svo til Rauða krossins til styrktar Malaví-verkefnisins.  

Að sjálfsögðu versluðum við mægur svolítið... og við keyptum nokkur stykki af svona endurunnum pappír sem ég nota þetta árið í jólamerkimiða og í jólainnpökkunina. 

Pappírinn hefur skemmtilega áferð og fallega kanta til þess að nota í svona gjafir :) Svo var líka búið að skreyta hann svo flott með glimmeri :)

Mér finnst mjög líklegt að það séu einhverjir foreldrar sem eiga búnka að svona pappír eftir börnin sem þau vita ekkert hvað á að gera við :)