Litla Hönnunar Búðin í Hafnarfirði.

Ég gerði mér ferð í Hafnarfjörðinn síðastliðinn þriðjudag og kíkti þar á Strandgötuna. Þar er að finna mikið af skemmtilegum búðum sem gaman er að kíkja í en ein af þessum skemmtilegu búðum er Litla Hönnunar Búðin.  Það er ekki hægt að segja annað en að ég heillaðist strax af þessari búð bara með því að skoða í gluggann. Þegar inn var komið var ég aldeilis ekki svikin en þar var heill hellingur af fallegum hlutum sem gaman var að skoða og láta sig dreyma um. Þar má finna allskonar skemmtilega hönnunarvöru í sambland við listmuni og fallega grafík. Verk eftir búðareiganda og fleiri íslenska listamenn og erlenda hönnuði. Ég fékk að smella af nokkrum myndum til þess að sýna ykkur og ég stóðst ekki mátið og fjárfesti í fallegum pappírs-nashyrning sem ég ætla að setja saman og hengja upp í stofunni minni. 

Ég get ekki annað en sagt að það er alveg þess virði að fá sér rúnt í Hafnarfjörðinn, kíkja í kaffi á Súfistann og taka rölt eftir Strandgötunni, skoða í búðirnar skemmtilegu, láta sig dreyma og jafnvel fjárfesta í einhverju fallegu :) Dásamleg uppskrift af góðum degi :) 

Le Wedding!

Þá er brúðkaupið búið... reyndar komnar alveg tvær vikur síðan...en bleika skýið svífur enn ;) 

En það sem þetta var gaman! ÓMÆ ÓMÆ! Ég held við komumst aldrei yfir þennan dag...enda draumur í dós frá upphafi til enda. En ég ætla aðeins að segja ykkur frá undirbúningnum og hverjir komu að þessu með okkur. 

Dæturnar tvær teiknuðu okkur hjónin fyrir boðskortið sem ég var semi búin að hanna en fékk það ekki til að vera eins og ég vildi hafa það þannig að ég gafst upp og fékk þær í Reykavík Letterpress til þess að klára boðskortið fyrir okkur. Við vorum að sjálfsögðu ekki svikin þar. Hér fyrir ofan og neðan sjáið þið fram og bakhlið boðskortsins. 

Veislan var haldin á bænum Fitjum í Skorradal. Draumastaðsetning í sveitasælunni þar sem gestir gátu gist á tjaldstæðinu alla helgina ef þeim hugnaðist það. Mjög margir nýttu sér það og því varð úr 3. daga veisla frá föstudegi til sunnudags ;) 

Á borðunum í veislunni var ég með innrammað instagram bingó sem ég gerði sjálf. Það var ekki að spyrja að því að húsmæðraskóla vinkonur mínar tóku bingóinu mjög alvarlega og unnu þetta með stæl.  Hvert einasta móment náðist á filmu og það er frábært að skoða þessar myndir eftirá. 

Mæli hiklaust með þessum leik ;) 

Greiðsluna gerði Marín besta vinkona mín en hún rekur hárgreiðslustofuna Hár-studio á Akranesi og er mjög fær í því sem gerir ;) 

Krissý Ljósmyndari tók fyrir okkur myndirnar og hún var með okkur allt frá undirbúningi þar sem við vorum að klæða okkur í fötin allt til þess að kakan hafði verið borðuð. Ég er búin að frá nokkrar myndir frá henni og er mjög ánægð með útkomuna....þó að óléttuandlitið á mér mætti nú hafa verið minna óléttulegt hehe.. ;) 

Hér fyrir neðan má sjá 4 myndir frá henni sem hún tók þennan skemmtilega dag ;)

Krissý er alveg með á hreinu hvernig best er að haga myndatökunni og stjórnar þessu léttilega í samræmi við brúðhjón (brúður) þannig að mómentin náist. Hún hefur mjög gott auga fyrir fallegum myndum og ég get alveg hiklaust mælt með henni :)

Kjólinn minn hannaði og saumaði fatahönnuðurinn Brynja Emils en Brynja hannar undir merkinu Besla. Ég mátaði þónokkra kjóla og mér fannst ég eins og flóðhestur í þeim öllum þannig að það kom ekkert annað til greina hjá mér en að láta sauma á mig kjól þar sem bumban er að taka svolítið til sín en ég vildi ekki hafa kjólinn of íburðamikinn. Við Brynja fundum þetta fallega antik-bleika satín í Vouge og það var ekki aftur snúið ;) Kjóllinn kláraðist deginum fyrir brúðkaup...smá stress en það verður að vera stress með á svona stundum. Ég er og var mjög ánægð með útkomuna á kjólnum enda er Brynja algjör snillingur ;) 

Borðaskreytingarnar sá ég sjálf um að útfæra og ég spilaði bara mjög út frá fallega veislusalnum sem að er á Fitjum. Sveitarómantíkin var allsráðandi og systur mínar og vinkonur þrusuðu upp salnum með mér í einum grænum með bros á vör. 

Kökuna fengum við svo í Mosfellsbakaríi. Hún var hrikalega góð og afskaplega falleg. Brúðhjónin ofaná kökuna komu úr dótakassanum hjá dætrunum en planið var að hafa enga styttu ofaná kökunni en svo rakst ég á þessi fallegu brúðhjón í einni tiltektinni og fékk þá hugmyndina að því að nota þau ;) Það kom mjög vel út :) 

Hönnunarmars 2015 - Smíðagripir

Smíðagripir eru stólar/barstólar hannaðir og smíðaðir af myndlistamanninum Daníeli Magnússyni. 

Daníel hóf að smíða þessa fallegu stóla fyrir um 23 árum síðan en stólarnir hafa notið töluverðra vinsælda síðustu árin. Stólana hans má meðal annars finna á 101 bar, Listasafni Reykjavíkur og á nýja vínbarnum í flugstöðinni okkar íslendinga... og svo má líka finna þá í eldhúsinu hjá mér ;) 

Smíðagripir eins og Daníel kýs að kalla stólana sína eru einkar þæginlegir en þeir eru allir á fjórum fótum og með snúanlegri sessu. Þeir eru ekki valtir og verða ekki grút skítugir neðst á fótum eins og svo margir barstólar verða. 

Daníel smíðaði fyrir mig fjóra stóla fyrir um ári síðan og ég get ekki sagt annað en þjónustan hafi alveg verið skemmtilega einstök. Við hjúin fengum að koma við á verkstæðinu hjá honum og hann útskýrði fyrir okkur hvernig allt saman virkar í stólnum (snúnings skífan og fleira) og við völdum hvernig fætur við vildum og hvaða viðartegund við vildum. Síðan fórum við í GÁ húsgögn og völdum okkur leður á sessuna og svo þremur vikum seinna voru tilbúnir fjórir handsmíðaðir fallegir stólar, merktir okkur hjúum undir og framleiðslunúmer á hverjum og einum. 

Mína stóla má skoða á síðustu tveimur myndunum hér fyrir neðan. 

Smíðagripir eru nú til sýnis á Hönnunarmars en þá má finna í Kirsuberjatrénu á Vesturgötunni

Hér fyrir neðan má svo sjá opnunartíma sýningarinnar í Kirsuberjatrénu um helgina.

Nýtt frá Hlín Reykdal.

Hlín Reykdal fata- og skartgripahönnuður kom með nýja línu af skarti nú fyrir þessi komandi jól sem er alveg einstaklega falleg.  Línan hefur skírskotun í skotthúfuna sem er hluti af íslenska þjóðbúningnum en skotthúfan hefur "skott" líkt og sjá má hér á hálsmeninu fyrir ofan. 

Línan er alveg afskaplega elegant og það er á hreinu að á jólagjafaóskalistanum mínum má finna eitt svona fallegt hálsmen með svörtu skotti :) 

Terta Duo - Ný íslensk hönnun

Terta Duo er nýtt íslenskt merki sem þessa dagana er að riðja sér til rúms í hönnunarheiminum hér á Íslandi. Á bakvið merkið standa þær María Marko og Þórunn Vilmarsdóttir en þær hafa nú þegar unnið að 5 vörum sem komnar eru á markað undir merkinu. 

Þær stöllur hafa verið að vinna mikið með fjármörkin í verkum sínum en fyrir þá sem ekki þekkja til þá eru það munstur sem klippt eru í eyrun á lömbum og löghelgar markeigandanum eignarréttinn á sauðfénu. Munstrin eru fyrir sumum mjög persónuleg og fyrir aðra eru þau einfaldlega safn af fallegum munstrum og hver og einn nýtur þeirra á sínum forsendum.

Fyrsta verk þeirra hjá Terta Duo var að hanna plaggat með munstrum fjármarkanna en síðar færðust munstrin yfir á púðaver og afmælisdagatöl þar sem unnið var með þau meira abstrakt. Núna fyrir jólin fóru þær stöllur einnig að framleiða Semanta sem eru demantar úr sementi og útikertastjaka sem er tilvalinn í öll veður og óveður, hannaður með íslenska veðráttu í huga.

Hvað er náttúrulegra heimili?

Nú ætla ég að reyna að koma eftirfarandi frá mér, án þess að það hljómi eins og fiðrildaprump og grænar hljóðbylgjur.

Fyrir skömmu var stofnaður hópur á Facebook, Náttúrulegra heimili.
Nafnið segir sig sjálft en þetta er eitthvað sem ég fór ekki að spá í af neinni alvöru fyrr en ég eignaðist barn. Vilja ekki allir það besta fyrir börnin sín? -Það besta er ekki það dýrasta.
Það er til aragrúi af álíka hópum en ég hef ekki fundið neinn á íslensku, fyrir íslenskar aðstæður.
Það er alltaf gaman að vera í félagsskap fólks sem spáir í svipuðum hlutum og þú. Það er enn skemmtilegra að vera í hópi sem hefur hvetjandi áhrif á þig.
Þrátt fyrir að hópurinn sé nýr ennþá þá hefur margt skemmtilegt og fræðandi verið rætt um. Þú þarft ekki að vera græn/n í gegn til að vera með.

Maíspokarnir sem eru nú loksins að birtast sem valmöguleiki í stað plast innkaupapoka við kassa í mörgum af stóru matvöruverslununum hafa verið ræddir.

Meðlimir hafa líka deilt uppskriftum af uppáhalds DIY hreinlætisvörunum sínum og það á eflaust margt eftir að bætast við. Ég er mjög spennt að prófa uppskrift af þessum líkamsskrúbbi:

Að "vera grænni" snýst ekki bara um að þvo ruslið og stafla því saman í eldhúsinu.
Það er hægt að gera svo miklu meira OG þú gætir bætt heilsuna og sparað í leiðinni. Því fylgir líka góð tilfinning, að finnast þú vera að gera eitthvað örlítið betur. Fyrir utan það að kenna börnunum betri siði.

- Borða betri mat og minnka aukaefnin sem heimilisfólkið þitt innbyrðir

• Að gefa sér aðeins meiri tíma í að útbúa matinn frá grunni.

- Nota hreinni hreinsivörur fyrir heimilið og líkamann

• Geturðu borið fram öll efnin sem snerta húðina á hverjum degi?

• Finnst þér það í lagi?

- Nota þína eigin orku meira til að komast á milli staða þegar þú getur, í stað bílsins.

• Hitaeiningar í stað mengunar

- Kaupa notaða hluti og gera að þínum eigin

Þú þarft ekki að gera allt í einu. Margt smátt gerir eitt stórt og allt það.
Það er alltaf gott að muna að góður göngutúr byrjar á einu skrefi.

Shorebirds eftir Sigurjón Pálsson

Nýlega setti fyritækið Norman Copenhagen í framleiðslu hjá sér nýja vörulínu af fuglum eftir íslenska hönnuðinn Sigurjón Pálsson. Línan nefnist Shorebirds eða strandfuglar á góðri íslensku. 

Línan telur þrjár tegundir af fuglum eða Spóann, Stelkinn og Sendlinginn og hafa þessir fallegu fuglar fengið gott pláss í hillum hönnunarbúða hér á landi. 

Ég var svo sniðug að nýta mér miðnæturopnun sem var nú í byrjun október hér á Akranesi til þess að kaupa mér fugl á afslætti. Fuglarnir eru nýlega lentir í hönnunar- og gjafavöruversluninni @home hér í bæ og ég get sagt ykkur það að þeir eru hver öðrum fallegri og því mjög erfitt að velja ;) 

Að lokum ákvað ég að taka Spóann með bleikum fótum en síðar eignast ég vonandi einn Stelk og einn Sendling :) 

Fögur hús um landið

Hofsós

Síðastliðnar tvær vikur hef ég verið á flakki um landið okkar fallega í sumarfríi með manni, börnum og vinum. Ég sá margt ótrúlega fallegt enda ekki furða þar sem landið okkar fallega leynir á fögrum stöðum hvert sem litið er. En þrátt fyrir fallegt landslag (sem ég tók jú líka myndir af) þá heillaðist ég mjög af fögrum húsum sem ég átti leið framhjá um allt land. Þannig æxlaðist það að ég fór að "safna húsum"...sem er mjög skemmtileg iðja. Börnin mín fóru að taka eftir þessu blæti mínu og fóru að hjálpa mér að finna fyndin, skemmtileg og falleg hús til þess að taka myndir af hvert sem við fórum manninum mínum til mikillar gleði (hann keyrði yfirleitt bílinn). "STOPPUM HÉR! - TÖKUM MYND AF ÞESSU HÚSI!! - SNÚA VIÐ!" heyrðist reglulega í aftursætinu og stundum var eins og við ætluðum aldrei að komast áfram þar sem margir bæjir landsins luma á svo mörgum fögrum og skemmtilegum húsum. 

Meðfylgjandi eru myndir af uppáhalds húsum þessarar ferðar...og eitt hús fær að fylgja með sem ég tók mynd af í fyrra en fyrir neðan myndirnar má sjá hvað húsin eru að finna. 

Gæti verið að ég hafi eignast nýtt ferðaáhugamál ;) 

Hofsós

Húsavíkur kirkja

Skriðuklaustur

Seyðisfjörður

Seyðisfjörður

Eskifjörður

Reyðarfjörður

Berufjörður 

(leiðréttið mig ef þetta er vitlaust hjá mér)

Höfn

Víkingaþorpið á Höfn

Trjákofi í Atlavík

Skagaströnd