Hvað er náttúrulegra heimili?

Nú ætla ég að reyna að koma eftirfarandi frá mér, án þess að það hljómi eins og fiðrildaprump og grænar hljóðbylgjur.

Fyrir skömmu var stofnaður hópur á Facebook, Náttúrulegra heimili.
Nafnið segir sig sjálft en þetta er eitthvað sem ég fór ekki að spá í af neinni alvöru fyrr en ég eignaðist barn. Vilja ekki allir það besta fyrir börnin sín? -Það besta er ekki það dýrasta.
Það er til aragrúi af álíka hópum en ég hef ekki fundið neinn á íslensku, fyrir íslenskar aðstæður.
Það er alltaf gaman að vera í félagsskap fólks sem spáir í svipuðum hlutum og þú. Það er enn skemmtilegra að vera í hópi sem hefur hvetjandi áhrif á þig.
Þrátt fyrir að hópurinn sé nýr ennþá þá hefur margt skemmtilegt og fræðandi verið rætt um. Þú þarft ekki að vera græn/n í gegn til að vera með.

Maíspokarnir sem eru nú loksins að birtast sem valmöguleiki í stað plast innkaupapoka við kassa í mörgum af stóru matvöruverslununum hafa verið ræddir.

Meðlimir hafa líka deilt uppskriftum af uppáhalds DIY hreinlætisvörunum sínum og það á eflaust margt eftir að bætast við. Ég er mjög spennt að prófa uppskrift af þessum líkamsskrúbbi:

Að "vera grænni" snýst ekki bara um að þvo ruslið og stafla því saman í eldhúsinu.
Það er hægt að gera svo miklu meira OG þú gætir bætt heilsuna og sparað í leiðinni. Því fylgir líka góð tilfinning, að finnast þú vera að gera eitthvað örlítið betur. Fyrir utan það að kenna börnunum betri siði.

- Borða betri mat og minnka aukaefnin sem heimilisfólkið þitt innbyrðir

• Að gefa sér aðeins meiri tíma í að útbúa matinn frá grunni.

- Nota hreinni hreinsivörur fyrir heimilið og líkamann

• Geturðu borið fram öll efnin sem snerta húðina á hverjum degi?

• Finnst þér það í lagi?

- Nota þína eigin orku meira til að komast á milli staða þegar þú getur, í stað bílsins.

• Hitaeiningar í stað mengunar

- Kaupa notaða hluti og gera að þínum eigin

Þú þarft ekki að gera allt í einu. Margt smátt gerir eitt stórt og allt það.
Það er alltaf gott að muna að góður göngutúr byrjar á einu skrefi.

HönnunarMarsipanið 2014

Nú styttist óðum í hönnunarmars og undirbúningur í óðaönn hjá þeim hönnuðum sem taka þátt í ár. Það er margt spennandi að sjá þetta árið og mikið af fallegum nýjum vörum. En það er ekki bara eitthvað að sjá... það er eitthvað gómsætt að smakka líka. HönnunarMarsipanið girnilega sem hannað af þeim Örnu Rut Þorleifsdóttir, vöruhönnuði og Rán Flygenring, grafískum hönnuði er eitthvað sem allir verða að smakka. HönnunarMarsipanið hefur verið sett á markað í kringum Hönnunarmars hátíðina tvisvar áður, en það kom fyrst á markað á Hönnunarmars árið 2011 og var selt í takmörkuðu upplagi, þá bleikt og gult á litinn, ég fjallaði einmitt um það hér. Árið 2012 endurtóku þær svo leikinn og framleiddu nammið þá í bleikum og bláum litum. Í ár eru það gulur og blár sem urðu svo fyrir valinu.  Þær Arna og Rán framleiða HönnunarMarsipanið í samvinnu við Sambó en fyrirmyndin af því eru litlu ferköntuðu molarnir í blandaða lakkríspokanum frá þeim. Nema hvað að HönnunarMarspanið er 1100% stærra en fyrirmyndin. 

Það er um að gera að kaupa sér Hönnunarmarsipan á Hönnunarmarsinum  en hluti af andvirði hvers selds kubbs rennur beint til krabbameinsfélagsins.  

Sölustaðir HönnunarMarsipansins eru:

Spark Design Space, Klapparstíg 33

Hrím, Laugavegi 25

Kraum, Aðalstræti 10

Vínberið, Laugavegi 43

Epal í Hörpu

Mýrin í Kringlunni

og fyrir landsbyggðina þá má panta HönnunarMarsipanið á Kaupstaður.is

Til hamingju með þetta stelpur ;) 

Food & Fun 2014

Við kæróinn lögðum leið okkar á Vox Restaurant í gærkvöldi til þess að borða á Food & Fun matarhátíðinni sem haldin er árlega.  Á Vox var Norðmaðurinn Sven Erik Renaa að kokka en hann bauð uppá 5 mjög góða rétti. En Sven var einmitt valinn matreiðslumaður hátíðarinnar í ár. 

Það vill svo skemmtilega til að Hilmar (kæróinn) er kokkur og hefur unnið á sama stað og Sven í Noregi, á Gastronomisk Institutt, en Hilmar var þar nokkru áður en Sven vann þar. Þannig að þeir gátu örlítið bondað og áttu sameiginlega vini úr kokkageiranum í Noregi. Sven Erik rekur sinn eigin veitingastað í Stavanger sem heitir Renaa Restauranter en staðinn má líka finna í Þrándheimi. Fyrir ykkur íslendingana úti í Noregi þá bara verðið þið að gefa ykkur tíma í að fá ykkur að borða hjá honum. Þvílíkt góður matur sem maðurinn gerir :) Ég er alveg viss um að þið verðið ekki svikin. 

Ég tók myndir af öllum réttunum nema einum en það var humarinn sem ég tók ekki mynd af...því ég fékk ekki þann rétt. Ég má því miður ekki borða humarinn eins leiðinlegt og það nú er. 

1. rétturinn - Amuse bouche (smakk): Norsk risahörpuskel, ígulker, hrogn og piparrótarfroða.

Réttur nr. 2 - Starter: var humarinn sem ég fékk ekki. 

Réttur nr. 3 - Appetizer: Þorskur og þroskhrogn með ótrúlega góðri jurta og hrognasósu. Með þessu var boðið uppá Brokkólí, söl og einhverskonar grænmetisduft. 

Þetta var minn uppáhalds réttur. Rosalega gott!

Hér má sjá Sven Erik í "aksjón" að gera aðalréttina tilbúna. Ég stalst þarna til þeirra til að taka eina mynd :) 

4. rétturinn - Aðalrétturinn var Lamb með jarðskokkum, lakrís, brúnuðu smjöri og sítrónu. - á disknum var tvennskonar lambakjöt, fillet og svo örlítið smakk af lambasíðu sem var mjög gott.

Svo er það 5. og síðasti rétturinn - Desertinn: Skyr-ís, súkkulaðimousse með sultaðri blóðappelsínu og blóðappelsínufroðu og súkkulaðimulning. Með þessu var svo pistasíu-svampur. Rosa gott. :) 

Svo varð auðvitað að fylgja mynd af kokkunum tveimur. Sven Erik Renaa matreiðslumaður hátíðarinnar og Hilmar matreiðslumaðurinn minn :) 

Matargleði Evu

Ég kíkti við á bókakynningu á nýju matreiðslubókinni hennar Evu Laufeyjar, Matargleði Evu, í dag. 

Það var að sjálfsögðu voðalega gaman að kíkja á hana, smella einum sætum á skvísuna og skoða nýju fallegu bókina hennar. Bókin, get ég sko sagt ykkur, stendur alveg undir væntingum og þar má finna fullt fullt af góðum uppskriftum sem nýtast vel í eldhúsinu heimavið.  

Þessi bók ætti að leynast í pakkanum handa öllum húsmæðrum um jólin :) 

Eva Laufey heldur líka úti matarbloggi, eins og flest ykkar vita, sem ofsalega gaman er að heimsækja og fá hugmyndir fyrir bakstur og kvöldmatinn. 

Ég keypti mér að sjálfsögðu eina bók og fékk auðvitað snillinginn til þess að árita bókina. Það er ekki leiðinlegt að eiga áritaðar bækur eftir svona snillinga:) 

Innilega til hamingju með bókina þína elsku duglega Eva og takk fyrir okkur ;) 

Afmælis..

Elsku fallega dóttir mín varð 8 ára á þriðjudaginn síðastliðinn og að sjálfsögðu hélt mamma hennar bekkjarafmæli fyrir dömuna. Kakan sem ég gerði sló alveg í gegn og börnin gleymdu alveg að smakka hinar sortirnar sem voru í boði því allir vildu fá sem mest af Monster High kökunni. 

Hér má sjá afmæliskökuna góðu sem sló svona rosalega í gegn..

..og svo var hún líka bara nokkuð góð :) 

Miss Ko - París

Einn af þeim skemmtilegu veitingastöðum sem ég heimsótti í París var veitingastaðurinn Miss Ko. Staðurinn er hannaður af hinum heimsfræga hönnuði Philippe Starck. 

Hönnun staðarins á að gefa fólki örlitla upplifun á asíska menningu og þann ævintýraheim sem þar er að finna. En staðurinn er bæði frekar hrár og yfirþyrmandi. Lýsingin er frekar dimm-rauð þarna inni en svo gefur barinn frá sér ljós þar sem að allur barinn er sjónvarpsskjár með milljón "litlum sjónvarpsstöðum".  Veggirnir eru allir flúraðir japönskum ævintýraheim og borðin eru frekar þétt. Allt þetta á að veita manni örlitla innsýn í götumenningu fjölmennustu borga Asíu.  

Miss Ko er staðsettur á besta stað í bænum eins maður segir, en hann er við aðal verslunargötu Parísar sem nefnist Champs-Elysées við hliðná Louis Vuitton tískuhúsinu. Þegar maður gengur út af staðnum eru öll helstu tískuhúsin rétt hjá ásamt því að hinn fagri Sigurbogi blastar sínu fegursta við enda götunnar nokkrum skrefum frá. 

Maturinn var mjög góður og matseðillinn var fjölbreyttur. Við fengum mjög gott sushi í forrétt ég fékk góðan kjúklingarétt í aðalrétt sem var bara mjög góður og asískur. 

Þegar okkur var svo réttur eftirréttaseðilinn þá leit hann út eins og vegabréf miss Ko og var alveg einstaklega fallegur. Tók því miður ekki mynd af honum, en vonandi bæta aðrar myndir það upp. 

Verðlagið var kannski frekar í hærra lagi miðað við það sem við eigum að venjast þegar við förum til útlanda, en ætli það hafi ekki bara verið svipað og við erum að rukka hér heima á vinsælum veitingastöðunum.

Heimagerðir hamborgarar.

Ég frétti að það væri allt að verða vitlaust hjá útilegugörpum og atvinnu-grillurum útaf heimagerðum hamborgurum. Allir alveg hreint sjúkir í þetta. Svo ég ákvað að prufa sjálf. 

Ég ákvað að byrja á því að prufa þetta fyrir mig og yngsta barnið á heimilinu. Prufukeyra þetta áður en ég færi að bjóða öðrum smakk svo ég keypti bara lítið af hakki. þetta hefðu í raun átt að verða 3 feitir hamborgarar en við vildum ekki of feita svo við gerðum einn lítinn auka. 

en hér er uppskriftin sirka. (ég slumpaði og var að nota nokkrar uppskriftir í bland)

300 gr. hakk. 

Graslaukur - góð slumma beint úr garðinum. 

hálfur rauðlaukur - lítill

sirka 2 handfylli af Doritos sem ég muldi út í

1-2 dl af rifnum osti

salt og svartur pipar 

Svo var þetta bara mótað á brettinu og skellt á grillið. 

Á neðstu myndinni lítur út fyrir að ekkert kjöt sé á borgaranum, en ég varð svo gráðug í girnilega salatið sem vex í garðinum mínum að það fékk að fara kannski heldur mikið fyrir myndatökuna. En þetta var rosa gott :) 

Salt Eldhús

Síðastliðinn þriðjudag fór ég ásamt skemmtilegum skvísum á námskeið hjá Salt Eldhús. Við lærðum þar hjá henni Auði í Salt að gera franskar makkarónur sem samkvæmt Auði eru mikil vísindi. Að baka franskar makkarónur er ansi flókin iðja og nauðsynlegt að fara vel eftir uppskrift þegar bakað er. En það sem skiptir ekki minna máli er rakastig í loftslaginu og því er nær ómögulegt að baka makkarónur ef það er rigning úti.  

Þegar komið er inn í eldhúsið hennar Auðar, Salt eldhús, þá verður maður einfaldlega bara hamingjusamari. Vel stíliserað eldhúsið fær mann til þess að líða eins og maður sé allt í einu kominn inn í einhverja skemmtilega bíómynd. Litavalið í eldhúsinu og öll smáatriði eru svo falleg að fólk eins og ég nær næstum ekkert að hlusta á það sem Auður segir á bakvið kennaraborðið. Athyglin fer alltaf á fellegu hlutina og vel samsett eldhúsið. Hvert einasta smáatriði er vel út hugsað og ekki mátti finna eitt einasta stílbrot. Bara fallgur skandinavískur sveitastíll eins og hann gerist bestur með vott af frönskum sveitastíl í bland.

 Auður hefur mikið unnið sem stílisti og heldur úti síðunni Tilefni.is ásamt því að reka Salt eldhús og fara út um allan heim á námskeið í matargerð. Auður býður uppá fjölbreytt námskeið í matargerð og hefur bæði haldið námskeið fyrir lokaða hópa sem og opin námskeið. 

Það má með sanni segja að Auður sé einhversskonar Nigella okkar íslendinga ;) 

Ég er allavega nokkuð viss um að ég eigi eftir að skrá mig á námskeið hjá Salt Eldhús næstkomandi haust. 

Auður kennir hópnum um vísindin á bakvið Franskar makkarónur

Einstaklega fallegur litur á KitchenAid vél. 

Hópurinn skemmtilegi :) 

Fallegu frönsku makkarónurnar komnar í skál heima. 

Nutella latte

Þetta er kaffibolli sem ég verð að prufa að gera. 

Uppskrift: 

1-faldur kaffi (eða eftir smekk)

Flóuð mjólk

1 msk nutella

1 tsk vanilla

örlítill kanill stráð yfir. 

Mjög girnilegt :) 

DIY: Cake Pops

Í mastersnámi mínu í listaháskólanum er ég að læra listkennslufræði. 

Í vikunni fékk ég það verkefni í skólanum að kenna eitthvað í gegnum ljósmyndir. Þ.e. myndirnar eiga að segja öll orðin og skrifaður texti á að vera óþarfur. Ég ákvað að kenna að búa til Cake Pops og notaði eldhúsborðið mitt sem ljósmyndastudíó. Í leiðinni var ég mikið að læra á nýju Nikon vélina mína sem ég keypti mér fyrir jólin. Ég tel mig hafa náð að útskýra þetta ágætlega í 19 skrefum (þó það vanti inn í að gott er að frysta kökupinnana áður en súkkulaðið er sett utanum, en ég ákvað að vera ekkert að flækja málin of mikið fyrir kennarann... - fyrir ykkur hin tek ég það fram í texta). 

Þegar maður byrjar aðgerðina þá er maður búinn að baka kökuna.

Náið þið þessu með því að horfa bara á myndirnar?

Hér er gott að setja pinnana í frysti í um klukkustund áður en haldið er áfram.